އެމެރިކާއާއެކު ޤާއިމުކުރި ސުލްހައިގެ ވަގުތީ އެއްބަސްވުން އެމެރިކާއިން މުގުރާލާފައިވާ ކަމަށް ބުނެ، ރައީސް ޑޮނަލްޑް ޓްރަމްޕްގެ ސޮޔަކީ ”އެއްވެސް އަގެއް ނެތް، ބާތިލް“ އެއްޗެއްގެ ގޮތުގައި އީރާނުގެ އެންމެ މަތީ ރޫޙާނީ ވެރިޔާ އާޔަތުއްލާ މުޖްތަބާ ޚާމަނައީ އިޢުލާނުކޮށްފިއެވެ. ހަނގުރާމަ ފެށުނުފަހުން ޚާމަނައީ ލިޔުމުން ދެއްވި ފުރަތަމަ މި ބަޔާން ހޮނިހިރު ދުވަހު ވަނީ އީރާނުގެ ދައުލަތުގެ ޓީވީން އިއްވާފައެވެ.
ޚާމަނައީ ބުނީ، މީގެ މަހެއްހާ ދުވަސް ކުރިން ދެޤައުމުގެ ރައީސުން ސޮއިކުރި ’ފަހުމުނާމާ‘ (އެމްއޯޔޫ) އާ އެމެރިކާއިން ތަކުރާރުކޮށް ޚިލާފުވެފައިވާ ކަމަށެވެ. އީރާނުގެ އެތެރޭގެ ބްރިޖްތަކަށާއި ފެން ކާރުޚާނާތަކަށް އެމެރިކާއިން ބޮންއެޅުމަކީ މީގެ ހެކިތަކެވެ. އޭނާ ބުނީ އެމެރިކާގެ ރައީސް ޓްރަމްޕުގެ ސޮޔަކީ ”އެއްވެސް އަގެއްހުރި އަދި އިތުބާރު ކުރެވޭނެ އެއްޗެއް ނޫން“ ކަމަށެވެ.
އެމެރިކާއިން ހަނގުރާމަ ވަރުގަދަކޮށް، އީރާނަށް ޙަމަލާދޭން އުޅޭނަމަ، އެމެރިކާގެ އަސްކަރިއްޔާއަށް ”ހަނދާނުން ނައްތާނުލެވޭނެ ފަދަ ހޫނު ފިލާވަޅުތަކެއް“ އީރާނުގެ ލަޝްކަރުތަކުންނާއި މުޅި މުޤާވަމަތު ފްރަންޓުން (ރެސިސްޓެންސް ފްރޮންޓު) ދޭނެ ކަމުގެ އިންޒާރު ޚާމަނައީ ދިނެވެ. މި ބަޔާނާއެކު އީރާނުގެ ޚާރިޖީ މުޝީރުން ވަނީ އެމެރިކާއާއެކު ދެން އެއްވެސް މަޝްވަރާއަކަށް ނުދާނެ ކަމަށް ބުނެފައެވެ.
