ސަރުކާރު ހިއްސާވާ ކުންފުނިތަކުގެ ހިންގުން ހަރުދަނާކުރުމުގެ ގޮތުން، ކުރިއަށް އޮތް ތިން މަސްދުވަހުގެ ތެރޭގައި މުވައްޒަފުންގެ އަދަދު 33 އިންސައްތައަށް މަދުކުރުމަށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން އަންގައިފިއެވެ.
މިދިޔަ އޭޕްރީލް މަހު ވެސް ޕީސީބީން ވަނީ ކުންފުނިތަކުގެ މުވައްޒަފުންގެ އަދަދު 33 އިންސައްތައަށް ކުޑަކުރުމަށް ސާކިއުލާއެއް ނެރެފައެވެ. ނަމަވެސް، މިދިޔަ އާދިއްތަ ދުވަހު އަލަށް ނެރުނު ސާކިއުލާގައި ވަނީ، މި މަހުގެ 13 ވަނަ ދުވަހުން ފެށިގެން ތިން މަސްދުވަހުގެ ތެރޭގައި އެ ލަނޑުދަނޑި ހާސިލުކުރުމަށް ސުންގަޑިއެއް ކަނޑައަޅާފައެވެ.
ކުންފުނިތަކުގެ ހަރަދުތައް ކުޑަކުރުމަށްޓަކައި ބައެއް ކުންފުނިތަކުން މިހާރު ވެސް ވަނީ ފިޔަވަޅުތަކެއް އަޅަން ފަށާފައެވެ. އެގޮތުން، އެޗްޑީސީ އާއި ފެނަކަ ފަދަ ކުންފުނިތަކުން، އަމިއްލައަށް ވަޒީފާއިން ވަކިވާން ބޭނުންވާ މުވައްޒަފުންނަށް ތިން މަސްދުވަހުގެ މުސާރައާ އެކު ވަކިވުމުގެ ފުރުސަތު ވަނީ ހުޅުވާލާފައެވެ.
ޕީސީބީން ހާމަކުރި ގޮތުގައި، މި ފިޔަވަޅުގެ މައިގަނޑު މަގުސަދަކީ ކުންފުނިތަކުގެ މަސައްކަތާއި އެކަށީގެންވާ މިންވަރަކަށް މުވައްޒަފުންގެ އަދަދު ތަރުތީބުކުރުމެވެ. މި ބަދަލުތައް މޮނިޓަރ ކުރުމުގެ ގޮތުން، ކޮންމެ ހަފުތާއެއްގެ އާދިއްތަ ދުވަހު މުވައްޒަފުންގެ އަދަދަށް އަންނަ ބަދަލުތަކުގެ ރިޕޯޓު ޕީސީބީއަށް ހުށަހެޅުމަށް ވެސް ވަނީ އަންގާފައެވެ.
ސަރުކާރު ކުންފުނިތަކުގެ މުވައްޒަފުން މަދުކުރުމުގެ ސިޔާސަތު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއުލާން ކުރެއްވީ، މިދިޔަ ލޯކަލް ކައުންސިލް އިންތިހާބަށް ފަހުގައެވެ. އަދި ކުންފުނިތަކުގެ ނިޒާމުތައް އިސްލާހުކޮށް، މާލީ ހިންގުން ހަރުދަނާކުރުމަށްޓަކައި މުވައްޒަފުންގެ އަދަދު ކުޑަކުރުމަށް ފިނޭންސް މިނިސްޓްރީން ވެސް ވަނީ ކުރިން އިރުޝާދު ދީފައެވެ.
މީގެ އިތުރުން، ކުންފުނިތަކުގެ އިސްރާފު ކުޑަކުރުމުގެ ގޮތުން މުސާރަ އާއި އިނާޔަތްތައް ކޮންޓްރޯލް ކުރުމާއި، ކޮންމެހެން ބޭނުންވާ ހާލަތްތަކުގައި ފިޔަވައި އާ މުވައްޒަފުން ނެގުމާއި މަގާމުގެ ކުރިއެރުން ދިނުން މަޑުޖައްސާލުމަށް ވެސް ވަނީ ނިންމާފައެވެ. އަދި އިތުރުގަޑީގެ މަސައްކަތްތަކާއި، ދަތުރުފަތުރާއި، އެހެނިހެން އިހުތިޔާރީ ހަރަދުތައް ކުޑަކުރުމަކީ ވެސް މި އިސްލާހީ ފިޔަވަޅުތަކުގެ ތެރޭގައި ހިމެނޭ މުހިންމު ކަންކަމެވެ.
