މޯލްޑިވްސް ކަސްޓަމްސް ސަރވިސްގެ މަސައްކަތްތައް ކުރިއަށް އޮތްތަނުގައި ބައްޓަންކުރާނީ މިހާރަށްވުރެ ބޮޑަށް ޑިޖިޓަލައިޒްކޮށް، ޒަމާނީ ޓެކްނޮލޮޖީގެ އެހީގައި ކަމަށް ހޯމް މިނިސްޓަރު ޢަލީ އިޙްސާން ވިދާޅުވެއްޖެއެވެ.
މިނިސްޓަރު އިޙްސާން މި މޭރުމުން ވިދާޅުވީ ކަސްޓަމްސްގެ 136 ވަނަ އަހަރީ ދުވަހާ ގުޅުވައިގެން ދެއްވި ހާއްސަ މެސެޖެއްގައެވެ. މިނިސްޓަރު ވިދާޅުވީ، ދައުލަތުގެ އެންމެ ދިގު ތާރީހެއް އޮތް މުއައްސަސާގެ މަސައްކަތްތައް ކުރިއަށް އޮތްތަނުގައި ބައްޓަންވެގެން ދާނީ ހިދުމަތްތައް ހަރުދަނާކުރެވި، ޑިޖިޓަލް އެންވަޔަރަމެންޓެއްގައި ކަމަށެވެ.
އަދި އެންފޯރސްމަންޓްގެ މަސައްކަތްތަކުގައި ޓެކްނޮލޮޖީ އެމްބެޑް ކުރެވި، ރާއްޖޭގެ ބޯޑަރުތައް މިހާރަށްވުރެ ބޮޑަށް ސަލާމަތާއި ރައްކާތެރިކަމާއެކު ބެލެހެއްޓުމުގެ ޒިންމާ ފުރިހަމައަށް އަދާކުރުމަށް ކަސްޓަމްސްއިން ކަމަރު ބަންނާނެ ކަމަށްވެސް މިނިސްޓަރު ވަނީ ވިދާޅުވެފައެވެ.
ރާއްޖޭގެ ބޯޑަރު ބެލެހެއްޓުމާއި، ވިޔަފާރިތަކަށް ފަހި މާހައުލެއް ގާއިމްކޮށްދިނުމުގެ އިތުރުން ދައުލަތަށް ވަންނަ އާމްދަނީ ރައްކާތެރިކަމާއެކު ބެލެހެއްޓުމުގައި ކަސްޓަމްސްއިން އަދާކުރާ ދައުރު ފާހަގަކުރައްވަމުން މިނިސްޓަރު ވަނީ މަސްތުވާތަކެއްޗާއި ގާނޫނީ ގޮތުން މަނާ ތަކެތި އަތުލައިގަތުމުގައި ކަސްޓަމްސްއިން ހޯދާފައިވާ ބޮޑެތި ކާމިޔާބީތަކުގެ މައްޗަށް އަލިއަޅުއްވާލައްވާފައެވެ.
ކަސްޓަމްސްގެ ހިދުމަތްތައް ހަރުދަނާކުރުމަށް ސަރުކާރުން ގިނަ މަސައްކަތްތަކެއް އަންނަނީ ކުރަމުންނެވެ. އެގޮތުން މާލެެއާއި އަތޮޅުތެރޭގެ ރަށްރަށުގައި ކަސްޓަމްސްގެ އޮފީސްތައް ގާއިމްކުރަމުން އަންނަކަން ފާހަގަކޮށްލެވެއެވެ.
ދިވެހިރާއްޖޭގައި ކަސްޓަމްސްގެ ހިދުމަތް ފަށާފައިވަނީ، 18 ޖުލައި 1890 ގައެވެ. ބަންޑާރަ ފިހާރައިގެ ނަމުގައި އޭރު ފެށި މި ހިދުމަތް މޯލްޑިވްސް ކަސްޓަމްސް ސަރވިސްގެ ނަމަށް ބަދަލުވީ، 11 ނޮވެމްބަރ 1998 ގައެވެ. އަދި ސިވިލް ސަރވިސްގައި ނުހިމެނޭ މަދަނީ މުއައްސަސާއެއްގެ ގޮތުގައި ކަސްޓަމްސް ބަދަލުވެގެންދިޔައީ، 11 މެއި 2011 ގައި ތަސްދީގުކުރި ދިވެހިރާއްޖޭގެ ކަސްޓަމްސްގެ ގާނޫނުގެ ދަށުންނެވެ.
