އެމެރިކާގެ ވައިގެ ޙަމަލާތައް އީރާނުގެ އެތެރޭގެ ވަޞީލަތްތަކަށް އަމާޒުވަމުންދާ ދަނޑިވަޅެއްގައި، ދުނިޔޭގެ އެންމެ މުހިންމު ތެޔޮ ދަތުރުކުރާ މަގު ކަމަށްވާ ހޮރްމޫޒް ކަނޑުއޮޅީގެ ޙާލަތު މުޅިން ކޮންޓްރޯލުން ނެއްޓިއްޖެއެވެ. އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ވަނީ ކަނޑުއޮޅީގައި ދެ ތެޔޮ ޓޭންކަރެއް ގޮވާފައިވާ ކަމަށާއި، ބްލޮކޭޑާ ޚިލާފުވި އެހެން 4 ވިޔަފާރި ބޯޓެއް ހިފަހައްޓާފައިވާ ކަމަށް އިޢުލާނުކޮށްފައެވެ.
އީރާނުގެ ބަޔާނުގައި ބުނެފައިވަނީ، ހޮރްމޫޒް ކަނޑުއޮޅީގެ ދެކުނު ސަރަހައްދުގައި އަތުރާފައިވާ ކަނޑުގެ މައިންތަކެއްގައި ޖެހި، ދެ ތެޔޮ ޓޭންކަރެއްގައި ބާރުގަދަ ގޮވުންތަކެއް ގޮވައި އަލިފާން ރޯވެފައިވާ ކަމަށެވެ. އީރާނުން ތުހުމަތުކުރާ ގޮތުގައި މި ބޯޓުތައް އެ ސަރަހައްދަށް ދަތުރުކުރީ އެމެރިކާގެ ޖާސޫސީ އިދާރާތަކުން ދިން ނުރައްކާތެރި އިރުޝާދުތަކަކަށެވެ. ނަމަވެސް އެމެރިކާގެ ސެންޓްރަލް ކޮމާންޑުން ވަނީ މި ވާހަކަ ދޮގުކޮށްފައެވެ.
މީގެ އިތުރުން، އެމެރިކާގެ އަސްކަރިއްޔާގެ އެހީތެރިކަމާއެކު ކަނޑުއޮޅި ހުރަސްކުރަން އުޅުނު ވިޔަފާރި ކުރާ 4 ބޯޓެއް، އީރާނުގެ މިސައިލް އަދި ޑްރޯން ލަޝްކަރުތަކުން ވަނީ ހުއްޓުވައި ހިފަހައްޓާފައެވެ.
އީރާނުން ވަނީ ހޮރްމޫޒް ކަނޑުއޮޅިއަކީ މިހާރު ދަތުރުކުރަން ”އިންތިހާއަށް ނުރައްކާތެރި“ އަދި ”އެއްކޮށް ބަންދު“ ތަނެއްގެ ގޮތުގައި އިޢުލާނުކޮށްފައެވެ.
