މާލޭގެ ބޮޑުތަކުރުފާނު މަގު ޒަމާނީ ފެންވަރަށް ތަރައްގީކުރުމުގެ މަޝްރޫއުގެ ދަށުން، ނޯތު ހާބަރުން ފެށިގެން ރަސްފަންނާ ދެމެދު އޮތް ސަރަހައްދުގެ މަސައްކަތް ވަރަށް އަވަހަށް ފަށްޓަވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ދަ ޕަލްސް ޕޮޓްކާސްޓްގެ 4 ވަނަ އެޕިސޯޑުގައި ދެއްވި އިންޓަރވިއުއެއްގައި ރައީސް ވިދާޅުވީ، ބޮޑުތަކުރުފާނު މަގު ތަރައްގީކުރުމުގެ މަސައްކަތް އެމްޓީސީސީއާ ހަވާލުކޮށްގެން ބާރުސްޕީޑުގައި ކުރިއަށްދާ ކަމަށެވެ. އެގޮތުން ހެންވޭރު ފެރީ ޓަރމިނަލުން ފެށިގެން އިއްޒުއްދީން ފާލަމާ ހަމައަށް މިހާރު ކުރިއަށްދާ ސަރަހައްދު އަންނަ ހަފުތާގެ ތެރޭގައި އާންމުންނަށް ހުޅުވާލެވޭނެ ކަމަށް އެމަނިކުފާނު ވިދާޅުވިއެވެ.
އަދި މި ސަރަހައްދު ނިމުމާއެކު، ދެން އޮތް މަރުހަލާގައި އެމްޕީއެލް ސަރަހައްދުން ފެށިގެން ރަސްފަންނާ ހަމައަށް ތަރައްގީކުރުމުގެ އަމަލީ މަސައްކަތް ފެށިގެންދާނެކަން ރައީސް ފާހަގަކުރެއްވިއެވެ.
”އިރާދަކުރެއްވިއްޔާ މަގުގެ މި ބައިގެ މަސައްކަތް މިހާރު މި ނިމެނީ. ދެން އޮތީ އެމްޕީއެލުން ފެށިގެން ރަސްފަންނާ ހަމައަށް އޮތް ސަރަހައްދު ތަރައްގީކުރުން. މިއީ ހަގީގަތުގައި އެންމެ ބޮޑަށް ހަލާކުވެފައި އޮތް ސަރަހައްދު. މި ބައި ނިމުމުން ބާޒާރުމައްޗަށާއި މާލޭގެ އެތެރޭގެ މަގުތަކުގެ ޓްރެފިކަށް ވަރަށް ބޮޑު ލުޔެއް ލިބިގެންދާނެ،“ – ރައީސް ވިދާޅުވިއެވެ.
މި މަޝްރޫއުގެ ދަށުން ބޭރު މަގު ފުޅާކޮށް، ދެކޮޅަށް ދުއްވޭ ދެ ލޭނު ހިމެނޭ ގޮތަށް ތަރައްގީކުރުމުން މުޅި މާލޭގެ ދަތުރުފަތުރަށް އިންގިލާބީ ބަދަލެއް އަންނާނެކަން ފާހަގަކުރައްވަމުން ރައީސް ވިދާޅުވީ، މި ބަދަލާއެކު ބާޒާރުމަތީގެ ތޮއްޖެހުން ކުޑަވެ، މާލޭގެ އެތެރޭގެ މަގުތަކަށް ބާރުބޮޑުވުން ހައްލުވެގެންދާނެ ކަމަށެވެ.
މީގެ އިތުރުން، ޕާކިންގެ މައްސަލައަށް ހައްލެއް ހޯދުމުގެ ގޮތުން މާލޭގެ ފަޅުތެރެއިން ބައެއް ހިއްކައިގެން ޕާކިންގ ޒޯނެއް ތަރައްގީކޮށްފައިވާކަން ވެސް ރައީސް ފާހަގަކުރެއްވިއެވެ. އެގޮތުން ހެންވޭރު ފެރީ ޓަރމިނަލުން ފެށިގެން އިއްޒުއްދީން ފާލަމާ ހަމައަށް ތަރައްގީކޮށްފައިވާ ސަރަހައްދުގައި 500 އަށްވުރެ ގިނަ އުޅަނދު ޕާކުކުރެވޭނެ އިންތިޒާމު ހަމަޖެހިގެންދާނެއެވެ.
