އެމްޑީޕީގެ ޗެއަރޕާސަންކަމުގެ މަގާމުން އިސްތިއުފާ ދިނުމުގެ އެއްވެސް ވިސްނުމެއް ނެތްކަމުގައި އެމްޑީޕީގެ ޗެއަރޕާސަން ފައްޔާޒު އިސްމާއިލް ވިދާޅުވެއްޖެއެވެ.
ފައްޔާޒު މިހެން ވިދާޅުވީ، ރޭ ބޭއްވުނު އެމްޑީޕީގެ ގައުމީ މަޖިލިސް ބައްދަލުވުމަށްފަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަށް ޖަވާބު ދެއްވަމުންނެވެ.
ފާއިތުވި މަޖިލިސް އިންތިޚާބަށްފަހު ފައްޔާޒު އެމްޑީޕީގެ ޗެއަރޕާސަންކަމުގެ މަގާމުން އިސްތިއުފާ ދިނުމަށް ގިނަ ފަރާތްތަކުން ދަނީ ގޮވާލަމުންނެވެ. އޭގެ ތެރޭގައި އެމްޑީޕީގެ ބައެއް ފަރާތްތަކާއި އެމްޑީޕީން ވަކިވެގެންދިޔަ ޑިމޮކްރެޓްސްއަށް ނިސްބަތްވާ ބައެއް ފަރާތްތައްވެސް ހިމެނެއެވެ.
މިރޭގެ ނޫސްވެރިންގެ ބައްދަލުވުމުގައި ފައްޔާޒު ވިދާޅުވީ އޭނާގެ އިސްތިއުފާއަށް ގޮވަމުންދާ ގިނަ މީހުންނަކީ އެމްޑީޕީއާއި އިދިކޮޅު ފަރާތްތަކަށް ކަމަށާއި، އެމްޑީޕީގެ ބައެއް މެމްބަރުންގެ ކަންބޮޑުވުންތައްވެސް ހުރިކަމަށް ގަބޫލުކުރާ ކަމުގައެވެ.
މިވަގުތު އިސްތިއުފާ ދިނުމުގެ އެއްވެސް ވިސްނުމެއް ނެތް އިނގޭތޯ.
– އެމްޑީޕީގެ ޗެއަރޕާސަން ފައްޔާޒް
ފައްޔާޒުގެ އިސްތިއުފާއާ ގުޅޭ ސުވާލާއި ބެހޭ ގޮތުން އެމްޑީޕީގެ ރައީސް ޝާހިދު ވެސް ވާހަކަދެއްކެވިއެވެ. ވިދާޅުވީ މިވަގުތު އެޕާޓީގެ ލީޑާޝިޕްގައި ތިއްބެވީ ބަލިވާ ކޮންމެ ފަހަރަކު މައިދާން ދޫކޮށް ފިލާނެ ބައެއް ނޫން ކަމަށެވެ.
ނިމިދިޔަ ރައްޔިތުންގެ މަޖިލީސް އިންތިހާބުގައި އެމްޑީޕީއަށް ކާމިޔާބު ކުރެވުނީ 12 ގޮނޑިއެވެ.
