އަތޮޅުތެރޭގެ ރަށްރަށުގައި ސިއްޙީ ޚިދުމަތް ދިނުމަށް ހުރި ދަތިތައް ހައްލުކުރުމަށް ސަރުކާރުން ކުރަމުންދާ މަސައްކަތުގެ ދަށުން، އިތުރު 17 ރަށަކަށް ބޭނުންވާ އެމްބިއުލާންސްތައް އެ ރަށްތަކާ މިއަދު ހަވާލުކޮށްފިއެވެ.
މިކަމަށްޓަކައި މިނިސްޓްރީ އޮފް ހެލްތުގައި ބޭއްވި ޚާއްޞަ ރަސްމިއްޔާތެއްގައި، އެމްބިއުލާންސްތަކުގެ ތަޅުދަނޑި އާއި މެނުއަލްތައް ސިއްޙީ މަރުކަޒުތަކާ ހަވާލުކޮށްދެއްވީ ސިއްޙަތާއި އާއިލާއާއި އިޖުތިމާއީ އެހީއާއި ބެހޭ ވަޒީރު ޤީލާ އަލީއެވެ. މި ރަސްމިއްޔާތުގައި އެމްބިއުލާންސް ލިބުނު ރަށްތައް ނިސްބަތްވާ ދާއިރާތަކުގެ ރައްޔިތުންގެ މަޖިލިސް މެންބަރުންވެސް ބައިވެރިވެވަޑައިގެންނެވިއެވެ.
އަތޮޅުތެރޭގެ ހޮސްޕިޓަލްތަކާއި ސިއްޙީ މަރުކަޒުތަކުގައި ބޭނުންނުކުރެވޭ ވަރަށް ހަލާކުވެފައިވާ އެމްބިއުލާންސްތަކުގެ ބަދަލުގައި އައު އެމްބިއުލާންސް ހޯދުމުގެ މި މަޝްރޫޢު ކުރިއަށް ގެންދަނީ މޯލްޑިވްސް ޕޯޓްސް ލިމިޓެޑް (އެމްޕީއެލް) އާ ހަވާލުކޮށްގެންނެވެ. މިގޮތުން 31 އެމްބިއުލާންސް ހޯދުމަށް މިދިޔަ އަހަރުގެ ޑިސެމްބަރު މަހު ހަވާލުކުރި 36.2 މިލިއަން ރުފިޔާގެ މަޝްރޫޢުގެ ދަށުން، މިދިޔަ މާރިޗު މަހު ވަނީ 14 އެމްބިއުލާންސެއް ހަވާލުކޮށްފައެވެ. މިއަދު ހަވާލުކުރެވުނީ އޭގެ ބާކީ ހުރި 17 އެމްބިއުލާންސެވެ.
އެންބިއުލަންސްގެ ޚިދުމަތް ދެމެހެއްޓެނިވި ގޮތުގައި ހުރިހާ ރަށަކަށް ފޯރުކޮށްދިނުމަށް ކުރެވެމުންދާ މަސައްކަތުގެ ތެރެެއިން، 17 ރަށަކަށް އެންބިއުލަންސް ހަވާލުކޮށްފި.
އެންބިއުލަންސް ހަވާލުކުރުމަށް މިރޭ ބޭއްވުނު ޚާއްސަ ރަސްމިއްޔާތުގައި 17 ރަށަކަށް އެންބިއުލަންސް ހަވާލުކޮށްދެއްވީ… pic.twitter.com/s1iGRWJIRH— Ministry of Health, Family and Welfare (@MoHmv) July 16, 2026
މި ރަސްމިއްޔާތުގައި ވާހަކަ ދައްކަވަމުން ވަޒީރު ޤީލާ ވިދާޅުވީ، މިއީ އަތޮޅުތެރޭގެ ސިއްޙީ ނިޒާމު އިތުރަށް ފުރިހަމަކޮށް، ފުރާނަ ސަލާމަތްކުރުމަށް ކުރެވޭ މަސައްކަތަށް ލިބުނު ބޮޑު ކުރިއެރުމެއް ކަމަށެވެ. އަދި މިފަދަ ވަސީލަތްތައް ފޯރުކޮށްދެއްވީތީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ވަޒީރު ޝުކުރު އަދާކުރެއްވިއެވެ.
އެމްޕީއެލްގެ ޑެޕިއުޓީ ސީއީއޯ މުޙައްމަދު ލަމްޢާން ވިދާޅުވީ، އެމްބިއުލާންސް ގެނައުމުގެ އިތުރުން އެ ތަކެތި ސާވިސްކުރުމާއި ދިމާވާ މައްސަލަތައް ހައްލުކުރާނެ ގޮތްތައްވެސް ފޯރުކޮށްދެވޭނެ ކަމަށެވެ.
އެމްބިއުލާންސް ހަވާލުކުރެވުނު 17 ރަށަކީ:
ށ. ކޮމަންޑޫ، ށ. ފޮއްދޫ، ނ. ހެނބަދޫ، ބ. ދަރަވަންދޫ، ބ. ފުޅަދޫ، ބ. ދޮންފަނު، ޅ. އޮޅުވެލިފުށި، ވ. ފުލިދޫ، ވ. ކެޔޮދޫ، މ. ވޭވަށު، އއ. ބޮޑުފޮޅަދޫ، އއ. ހިމަންދޫ، އދ. ކުނބުރުދޫ، އދ. ދަނގެތި، ލ. ފޮނަދޫ، ގއ. ކޮނޑޭ އަދި ގދ. ވާދޫއެވެ.
މި ސަރުކާރު ހަވާލުވިފަހުން މިހާތަނަށް ޖުމްލަ 87 އެމްބިއުލާންސް ރަށްރަށާ ހަވާލުކުރެވިފައިވާއިރު، ޚިދުމަތް މެދުކެނޑިފައިވާ އިތުރު 4 ރަށަކަށްވެސް މިއަހަރު ތެރޭގައި އެމްބިއުލާންސް ފޯރުކޮށްދޭނެ ކަމަށް ހެލްތް މިނިސްޓްރީން ބުނެއެވެ. މީގެ އިތުރުން، މާލެ ސަރަހައްދާއި ސިޓީތަކުގައި ޕެރަމެޑިކް ޚިދުމަތް ފެށުމަށް 10 ޕެރަމެޑިކް އެމްބިއުލާންސް ގެނައުމުގެ މަސައްކަތްވެސް ދަނީ ކުރަމުންނެވެ.
