ބުދު ދީނަށް ނިސްބަތްވާ މިޔަންމާ އަސްކަރީ ވެރިކަމުގެ އަނިޔާވެރިކަމުން ސަލާމަތްވުމަށް ކަނޑުމަގުން ދަތުރުކުރި 500 އަށްވުރެ ގިނަ ރޮހިންޔާ މުސްލިމުން، އެމީހުން ދަތުރުކުރި ދެ ބޯޓު ފެތުމުގެ ސަބަބުން ނިޔާވެފައިވާކަމަށް އދ. އިން ލަފާކޮށްފިއެވެ. މިއީ ފަހުގެ ތާރީޚެއްގައި ރޮހިންޔާ ދަރިކޮޅުގެ މީހުންނަށް ކަނޑުމަތީގައި ދިމާވި އެންމެ ހިތާމަވެރި އެއް ހާދިސާއެވެ.
އިންޓަނޭޝަނަލް އޯގަނައިޒޭޝަން ފޯ މައިގްރޭޝަން (އައިއޯއެމް) އަދި ޔޫ.އެން.އެޗް.ސީ.އާރު އިން ބުނިގޮތުގައި، 250 މީހުންނާއެކު ޖޫން މަހުގެ ފަހުކޮޅު މިޔަންމާގެ ރާޚައިން ސްޓޭޓުން ފުރި ބޯޓެއް ވަނީ ފުރިތާ ކުޑަ އިރުކޮޅެއްގެ ތެރޭގައި ޚަބަރު ހުސްވެފައެވެ.
280 މީހުންނާއެކު ދަތުރުކުރި ދެވަނަ ބޯޓު ފެތިފައިވަނީ ޖުލައި 8 ވަނަ ދުވަހު މިޔަންމާގެ އަޔެޔާވާދީ އައްސޭރިފަށަށެވެ. މި ބޯޓުތަކުގައި ގިނައިން ތިބީ ރޮހިންޔާ މުސްލިމުންނެވެ. އޭގެ ތެރޭގައި ބަންގްލަދޭޝްގެ ކޮކްސް ބާޒާރުގެ ރެފިއުޖީ ކޭމްޕުތަކުން އައި މީހުންވެސް ހިމެނެއެވެ.
އދ. ގެ އިދާރާތަކުން ފާހަގަކުރާ ގޮތުގައި، މި ދަތުރުތައް ކޮށްފައިވަނީ އާންމުކޮށް ކަނޑުދަތުރުކުރާ މޫސުމުން ބޭރުން، މޫސުން ވަރަށް ގޯސް ދުވަސްވަރެއްގައެވެ. ވިއްސާރަވުމާއި ކަނޑުގަދަވުމުގެ ސަބަބުން މި ދަތުރުތަކުގެ ނުރައްކާ އޮތީ އިންތިހާއަށް ބޮޑުވެފައެވެ.
މިޔަންމާގެ އަސްކަރިއްޔާގެ އަނިޔާވެރިކަމުން ސަލާމަތްވުމަށް 1.2 މިލިއަން ރޮހިންޔާ މުސްލިމުން މިހާރުވެސް ދިރިއުޅެމުންދަނީ ބަންގްލަދޭޝްގެ ތޮއްޖެހިފައިވާ ކޭމްޕުތަކުގައެވެ. ޔޫ.އެން.އެޗް.ސީ.އާރު އިން ބުނާގޮތުގައި ފާއިތުވި 2025 ވަނަ އަހަރަކީ މި މަގުން ދަތުރުކުރި މީހުންނަށް އެންމެ ނުރައްކާތެރި އަހަރެވެ. އެ އަހަރު 6،500 މީހުން ދަތުރުކުރިއިރު، 900 އެއްހާ މީހުން ވަނީ ކަނޑުމަތީގައި މަރުވެ ނުވަތަ ގެއްލިފައެވެ.
