ބޭންކް އޮފް މޯލްޑިވްސް (ބީއެމްއެލް) އިން ތައާރަފުކުރި ޑިޖިޓަލް ވޮލެޓް ”ސްވައިޕް“ ބޭނުންކުރާ ދިވެހިންގެ އަދަދު 20,000 އަށްވުރެ މައްޗަށް އަރާފައިވާ ކަމަށް އެ ބޭންކުގެ ސީއީއޯ މުޙައްމަދު ޝަރީފް ވިދާޅުވެއްޖެއެވެ.
ބީއެމްއެލްގެ ޔޫތު އެންޓްރަޕްރިނިއަރސް ފޯރަމް ފެށުމުގެ ރަސްމިއްޔާތުގައި ވާހަކަދައްކަވަމުން ޝަރީފް ވިދާޅުވީ، ސްވައިޕަކީ ބައިނަލްއަގުވާމީ ފެންވަރުގެ މިންގަނޑުތަކަށް ފެތޭ، ދިވެހިންގެ އަމިއްލަ އުފެއްދުމެއް ކަމަށެވެ. މި އަހަރުގެ މާރިޗު މަހު އިފްތިތާހުކުރި މި ހިދުމަތަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޑިޖިޓަލް އިކޮނޮމީގެ ތަސައްވުރު ކާމިޔާބުކުރުމަށް އެޅުނު މުހިންމު ފިޔަވަޅެކެވެ.
ޝަރީފް ފާހަގަކުރެއްވި ގޮތުގައި، ސަރުކާރުގެ އަމާޒަކީ 2030 ވަނަ އަހަރާ ހަމައަށްދާއިރު ރާއްޖޭގެ ޖީޑީޕީގެ 15 އިންސައްތަ ޑިޖިޓަލް އިގްތިސާދުގެ މައްޗަށް ބިނާކުރުމެވެ. މިހާރުވެސް ރާއްޖޭގެ އެކި ސަރަހައްދުތަކުގައި ހިމެނޭ 3,300 އަށްވުރެ ގިނަ ވިޔަފާރިތަކަށް ސްވައިޕް މެދުވެރިކޮށް ފަސޭހަކަމާއެކު ފައިސާ ދެއްކޭނެ އިންތިޒާމު ވަނީ ހަމަޖެހިފައެވެ.
މީގެ އިތުރުން، އެއްވެސް އިތުރު ފީއަކާ ނުލައި ރާއްޖެއިން ބޭރަށް ފައިސާ ފޮނުވުމާއި، ބޭރުން ފޮނުވާ ފައިސާ ބަލައިގަނެވޭނެ އިންތިޒާމު މިހާރު ވަނީ މި ޕްލެޓްފޯމުގައި ގާއިމުކޮށްފައެވެ. ވަކިން ހާއްސަކޮށް ޔޫއެސް ޑޮލަރު، އިނގިރޭސި ޕައުންޑް އަދި ޔޫރޯއިން ބައިނަލްއަގުވާމީ އެކައުންޓްތައް ހުޅުވުމުގެ ފުރުސަތު މިހާރު ވަނީ ހުޅުވާލެވިފައެވެ. މީގެ ސަބަބުން ކޮންޓެންޓް ކްރިއޭޓަރުންނާއި ފްރީލާންސަރުންނަށް ބޭރު ގައުމުތަކުން ލިބޭ ފައިސާ، އެ ގައުމެއްގެ ލޯކަލް ޕޭމަންޓެއް ފަދައިން ވަގުތުން ލިބިގެންދާނެއެވެ.
ބޭންކުން ހާމަކުރި ގޮތުގައި، ރާއްޖޭން ބޭރުގެ ފަރާތްތަކަށްވެސް އީ-ކޭވައިސީ ފުރިހަމަކުރުމަށްފަހު މި ހިދުމަތުގައި ރަޖިސްޓްރީވެވޭނެއެވެ. އަދި އަލިޕޭ، ވީޗެޓް ޕޭ، މާސްޓަރކާޑު އަދި ވީސާ ފަދަ ބައިނަލްއަގުވާމީ ނެޓްވޯކްތަކާ ގުޅިގެން، ފިޒިކަލް ކާޑަކާ ނުލައި ފައިސާ ދެއްކޭނެ ނިޒާމެއް މި އަހަރުގެ ފަހުކޮޅު ތައާރަފުކުރުމަށް ދަނީ ތައްޔާރުވަމުންނެވެ.
މިއީ ބައިނަލްއަގުވާމީ މައިދާނުގައި މަސައްކަތްކުރާ ދިވެހި ޒުވާނުންނަށް ލިބިގެންދާނެ އިންގިލާބީ ކުރިއެރުމެއްގެ ގޮތުގައި ބީއެމްއެލްއިން ސިފަކުރެއެވެ.
