ބޭންކް އޮފް މޯލްޑިވްސް (ބީއެމްއެލް) އާ ގުޅޭގޮތުން ދޮގު މައުލޫމާތު ފެތުރުމުން މުޅި ގައުމަށް އެކަމުގެ ގެއްލުން ލިބޭކަމަށް ބީއެމްއެލްގެ ސީއީއޯ މުޙައްމަދު ޝަރީފް މިއަދު ވިދާޅުވެއްޖެއެވެ.
މިއަދު ބޭއްވި ”ޔޫތު އޮންޓްރަޕްރިނަރސް އެކްސްޕޯ“ ހުޅުވުމުގެ ރަސްމިއްޔާތުގައި ވާހަކަދައްކަމުން ސީއީއޯ ޝަރީފް ވިދާޅުވީ ހަބަރު ފަތުރާ ވަސީލަތްތަކާއި ސޯޝަލް މީޑިއާ މެދުވެރިކޮށް ބައެއް ފަރާތްތަކުން ބޭންކާ މެދު ސައްހަ ނޫން މައުލޫމާތު ފަތުރަމުންދާ ކަމަށެވެ. އެގޮތުން ބީއެމްއެލްގައި ޑޮލަރު ނެތް ކަމަށާއި، ބޭންކު ޕްރޮފެޝަނަލްކޮށް ނުހިންގާ ކަމަށާއި، ކޮންޓްރެކްޓަރުންނަށް ލޯނު ދޫކޮށްގެން ނުވާނެ ކަމަށް ބުނެ ފެތުރި ވާހަކަތައް ޝަރީފް ފާހަގަކުރެއްވިއެވެ.
ޝަރީފް ވިދާޅުވީ މިފަދަ ގޮތަކަށް ވާހަކަ ދައްކައިގެން ބޭންކުގައި ޑޮލަރު ނެތްކަމުގެ ތަސައްވުރެއް އުފެއްދުމުގެ ބޭނުމަކީ ކަޅުބާޒާރުގައި ޑޮލަރުގެ އަގު ބޮޑުކުރުން ކަމަށެވެ. ބީއެމްއެލް އަކީ ދިވެހިރާއްޖޭގެ އިގުތިސާދާ ލާމެހި ގުޅިފައިވާ ބޭންކެއް ކަމުން، ބޭންކާ މެދު ނުރަނގަޅު ތަސައްވުރެއް އުފެއްދުމުން ދިވެހި އިގުތިސާދަށް ފޫނުބެދޭ ފަދަ ގެއްލުން ލިބިދާނެ ކަމަށް ވެސް ޝަރީފް ވިދާޅުވިއެވެ.
”ކޮންމެ މަގުސަދެއްގައި ކަމުގައިވީ ނަމަވެސް މި ބޭންކާ މެދު ހަގީގަތާ ހިލާފު މައުލޫމާތު ނުފެތުރުމަށް އަޅުގަނޑު އެދެން،“ – ޝަރީފް ވިދާޅުވިއެވެ.
ބީއެމްއެލްއިން މިއަދު ބޭއްވި ރަސްމިއްޔާތުގައި ހަތް ރަށެއްގައި ބީއެމްއެލްގެ ބްރާންޗު ހުޅުވިއެވެ. އަދި ޒުވާން ވިޔަފާރިވެރިން ބިނާކުރުމަށް އާ ފައިނޭންސިން ފެސިލިޓީއެއް ތައާރަފްކޮށް، ޒުވާނުންނަށް އާ ފުރުސަތުތައް ފަހިކޮށްދިނުމުގެ ގޮތުން ޑިޖިޓަލް ވޮލެޓް ’ސުވައިޕް‘ އަށް ބޭރުން ފައިސާ ގެނެވޭނެ ހިދުމަތް ވެސް ވަނީ ތައާރަފްކޮށްފައެވެ.
