ބޭންކް އޮފް މޯލްޑިވްސް (ބީއެމްއެލް) އިން އެސްއެމްއީ ޑިޖިޓަލްއާ ގުޅިގެން 18 އަހަރާއި 30 އަހަރާ ދެމެދުގެ ޒުވާނުންނަށް ވިޔަފާރިތައް ފެށުމަށާއި ފުޅާކުރުމަށް މަގުފަހިކޮށްދޭ ”ޔޫތު އޮންޓްރަޕްރިނާޝިޕް ފައިނޭންސިން“ ތައާރަފުކޮށްފިއެވެ.
މިއަދު ބޭއްވި ”ޔޫތު އޮންޓްރަޕްރިނާސް އެކްސްޕޯ“ ގައި މި ފައިނޭންސިން ފެސިލިޓީ ރަސްމީކޮށް އިފްތިތާހުކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއެވެ. މި ފެސިލިޓީއަކީ ޒުވާން ވިޔަފާރިވެރިންނަށާއި ފްރީލާންސްކޮށް މަސައްކަތްކުރާ ފަރާތްތަކަށް އަމާޒުކޮށްގެން ފަރުމާކޮށްފައިވާ ހާއްސަ ސްކީމެކެވެ.
މީގެ މައިގަނޑު މަގުސަދަކީ އެއްވެސް ރަހުނަކާ ނުވަތަ އިކުއިޓީއަކާ ނުލައި ވިޔަފާރި ފެށުމަށް ބޭނުންވާ ރައުސްމާލު ފަސޭހައިން ހޯދައިދިނުން ކަމަށް ބީއެމްއެލުން ބުނެފައިވެއެވެ.
މި ފެސިލިޓީގެ ދަށުން ޝަރުތު ހަމަވާ ފަރާތްތަކަށް 150,000 ރުފިޔާއާ ހަމައަށް ފައިނޭންސިން ލިބޭނެއެވެ. އަހަރަކު ހަތް ޕަސަންޓުގެ ކުޑަ ޕްރޮފިޓް ރޭޓެއްގައި ދޫކުރާ މި ފެސިލިޓީގެ އެންމެ ހާއްސަ އެއް ސިފައަކީ 24 ގަޑިއިރު ތެރޭގައި ލޯނު ޕްރޮސެސްކޮށް ނިންމައިދިނުމެވެ. ލޯނު އަނބުރާ ދެއްކުމަށް ފަސް އަހަރުގެ މުއްދަތެއް ކަނޑައެޅިފައިވާއިރު، ފުރަތަމަ ހަ މަސްދުވަސް ގްރޭސް ޕީރިއަޑެއްގެ ގޮތުގައި ލިބިގެންދާނެއެވެ.
ބީއެމްއެލްގެ ސީއީއޯ އަދި މެނޭޖިން ޑައިރެކްޓަރު މުހައްމަދު ޝަރީފް ވިދާޅުވީ، މިއީ ރާއްޖޭގެ މުސްތަގުބަލަށް ކުރެވޭ އިންވެސްޓްމަންޓެއް ކަމަށެވެ. އެއް ބިލިއަން ރުފިޔާގެ މި ސްކީމްގެ ސަބަބުން ޒުވާނުންގެ ހިޔާލުތައް އަމަލީ ވިޔަފާރިއަކަށް ބަދަލުވެގެންދާނެ ކަމަށް އޭނާ ފާހަގަކުރެއްވިއެވެ.
މީގެ އިތުރުން އެސްއެމްއީ ޑިޖިޓަލްގެ ސީއީއޯ ބަދުރުއްދީން ހަސަން ވިދާޅުވީ، މި ސްކީމުގެ ސަބަބުން ވިޔަފާރި ފެށުމުގައި ހުރި ގޮންޖެހުންތައް ކުޑަވެ، އައު ޖީލުގެ ވިޔަފާރިވެރިންނަށް އިތުބާރާއެކު ކުރިއަށް ދިއުމުގެ ފުރުސަތު ފަހިވެގެންދާނެ ކަމަށެވެ.
