ފަލަސްތީނުގެ ޙާލަތާ ގުޅޭގޮތުން ސޯޝަލް މީޑިއާގައި ޕޯސްޓުތަކެއް ކުރުމާ ގުޅިގެން، ލަކްސަމްބާގުގައި މަސައްކަތްކުރަމުން އައި ޓީޗަރަކު ވަޒީފާއިން ވަކިކޮށްފިއެވެ.
މި ޓީޗަރަކީ 2002 ވަނަ އަހަރު އުމުރުން 8 އަހަރުގައި ރެފިއުޖީއެއްގެ ގޮތުގައި ލަކްސަމްބާގަށް ދިޔަ ބޮސްނިއާގެ ރައްޔިތެއްކަމަށްވާ ފާތިމާ ކުރްތިކްއެވެ. އޭނާ ބުނިގޮތުގައި، އޭނާގެ ޕޯސްޓުތަކުގައި ފާޅުކޮށްފައިވަނީ ފަލަސްތީނުގެ ރައްޔިތުންނަށް ތާއީދުކުރުމާއި، ޣައްޒާގައި ކުރަމުންދާ ހަނގުރާމައާ ދެކޮޅުހެދުމެވެ.
އޭނާ އިތުރަށް ފާހަގަކުރިގޮތުގައި، އޭނާގެ އެއްވެސް ޕޯސްޓެއްގައި ޔަހޫދީންނާ ދެކޮޅު އެއްވެސް ވާހަކައެއް ނުވަތަ ޔަހޫދީ ދީނަށް ފުރައްސާރަކުރާ ފަދަ އެއްވެސް އެއްޗެއް ހިމެނިފައި ނުވާނެއެވެ. އަދި އޭނާ ފާޑުކިޔާފައިވަނީ ހަމައެކަނި އިޒްރޭލުގެ ޢަމަލުތަކަށް ކަމަށް އޭނާ ބުނެފައިވެއެވެ. ވަޒީފާ ގެއްލުނު ނަމަވެސް، ފަލަސްތީނުގައި ހިނގަމުންދާ ”ޖެނޮސައިޑް“ (ޤަތުލުއާންމު) އާ ދެކޮޅަށް އަޑުއުފުލުން ހުއްޓައިނުލާނެ ކަމަށް އޭނާ ވަނީ ބުނެފައެވެ.
