ސަޢުދީ ޢަރަބިއްޔާއަށް އަމާޒުކޮށް ދެމުންދާ ބެލިސްޓިކް މިސައިލް ހަމަލާތައް، ދިވެހި ސަރުކާރުން ހަރުކަށި އިބާރާތުން ކުށްވެރިކޮށްފިއެވެ.
މިކަމާ ގުޅިގެން ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ، ސަޢުދީއަށް އަމާޒުކޮށް ދެމުންދާ މިސައިލް ހަމަލާތަކަކީ އެ ގައުމުގެ މިނިވަންކަމާއި އިސްތިގުލާލަށް އަރައިގަތުމުގެ ގޮތުން ދެމުންދާ ފިނޑި ހަމަލާތަކެއް ކަމަށެވެ. އަދި މިއީ މުޅި ސަރަހައްދުގެ ސަލާމަތާއި ހަމަޖެހުމަށް އޮތް ބޮޑު ނުރައްކަލެއްގެ ގޮތުގައި ދިވެހި ސަރުކާރުން ދެކޭ ކަމަށްވެސް އެ ބަޔާނުގައި ފާހަގަކޮށްފައިވެއެވެ.
ފޮރިން މިނިސްޓްރީގެ ބަޔާނުގައި އިތުރަށް ބުނެފައިވަނީ، މި ދަތި އުނދަގޫ ދަނޑިވަޅުގައި ދިވެހި ސަރުކާރާއި ރައްޔިތުން ތިބީ ސަޢުދީ ސަރުކާރާއި އެ ގައުމުގެ ރައްޔިތުންނާއެކު ސާބިތުކަމާއެކުގައި ކަމަށެވެ. ސަޢުދީ ޢަރަބިއްޔާގެ ސިޔާދަތާއި ރައްކާތެރިކަން ދެމެހެއްޓުމަށްޓަކައި އެ ގައުމުން އަޅާ ކޮންމެ ފިޔަވަޅަކަށް ރާއްޖެއިން ފުރިހަމައަށް ތާއީދުކުރާނެކަމުގެ ޔަގީންކަންވެސް ދިވެހި ސަރުކާރުން ވަނީ ދީފައެވެ.
ފޮރިން މިނިސްޓްރީން މިފަދަ ބަޔާނެއް ނެރެފައިމިވަނީ، ހޫތީ ހަނގުރާމަވެރިން ސަޢުދީގެ އެއާޕޯޓަކަށް ވައިގެ މަގުން ނުރައްކާތެރި ހަމަލާތަކެއް ދީފައިވާ ދަނޑިވަޅެއްގައެވެ. މެދުއިރުމަތީގެ މަޝްރަހު މިހާރު އޮތް ގޮތުން، ސަރަހައްދީ ސުލްހަ ގާއިމުކުރުމަށްޓަކައި ހަނގުރާމައިގެ ބަދަލުގައި މަޝްވަރާގެ މަގު އިސްކުރުމުގެ މުހިންމުކަމުގެ މައްޗަށްވެސް ދިވެހި ސަރުކާރުން ވަނީ އަލިއަޅުއްވާލައްވާފައެވެ.
މެދުއިރުމަތީގެ މަޝްރަހު އަނެއްކާވެސް ހޫނުވެފައިވާއިރު ފާހަގަކޮށްލަންޖެހޭ ކަމަކީ، އެމެރިކާ އާއި އީރާނާ ދެމެދު އޮތް ގުޅުން އަނެއްކާވެސް އިންތިހާއަށް ގޯސްވެފައިވާ ކަމެވެ.
