ހއ. ހޯރަފުށީގައި ހުންނަ ކުޑަކުދިންގެ ރިހިބިލިޓޭޝަން ސެންޓަރު (ހާފްވޭ ހައުސް) ގައި ތިބި ކުދިންތަކެއް އެ މަރުކަޒުން ފިލައިގެން ނުކުމެ، އެ ރަށު އަތިރިމަތީގައި މަސްބާނަން ހުރި މީހަކު ރަހީނުކޮށްފިއެވެ.
މި ހާދިސާ ހިނގާފައިވަނީ ރޭގެ ވަގުތެއްގައެވެ. މައުލޫމާތު ލިބިފައިވާ ގޮތުގައި، އެ މަރުކަޒުން ނުކުތް ކުދިންތަކެއް ވަނީ އަތިރިމަތީގައި މަސްބާނަން ހުރި މީހާ ހިފަހައްޓައި، އޭނާ ރަހީނުކޮށްގެން ގެންގޮސް، ވަރަށް ބޮޑަށް އަނިޔާކުރުމަށްފަހު ރަށުގެ ފަޅު ގޯއްޗެއްގެ ތެރެއަށް ވަނީ އެއްލާލާފައެވެ. މި ހާދިސާގައި އަނިޔާ ލިބިފައިވަނީ އުމުރުން 30 އަހަރުގެ ފިރިހެނަކަށެވެ.
މި ހާދިސާއާ ގުޅިގެން ހޯރަފުށީގެ މަސްލަހަތު ވަނީ ވަރަށް ބޮޑަށް ގޯސްވެފައެވެ. މި ހާދިސާއާ ގުޅިގެން އެ ރަށުގެ ރައްޔިތުން ވަނީ ކަންބޮޑުވުން ފާޅުކޮށް، އެ ކުދިން ބައިތިއްބާފައިވާ މަރުކަޒުގެ ސަލާމަތީ ކަންކަމާ މެދު ސުވާލު އުފައްދާފައެވެ. ރަށުގެ ގިނަ އަދަދެއްގެ ބަޔަކު ވަނީ މިކަމުގެ ސަބަބުން ރަށުގެ އަމާންކަން ގެއްލިފައިވާ ކަމަށް ބުނެފައެވެ.
މި ހާދިސާގައި އަނިޔާ ލިބުނު މީހާއަށް މިހާރު ދަނީ ހޯރަފުށީ ސިއްހީ މަރުކަޒުގައި ފަރުވާ ދިނުމަށްފަހު އިތުރު ފަރުވާއަށް މިހާރު ވަނީ ހއ. ދިއްދޫ ހޮސްޕިޓަލުގައި ފަރުވާދޭން ފަށައިފައެވެ. އޭނާއަށް ލިބިފައިވާ އަނިޔާތަކުގެ ތަފްސީލު އަދި ސާފު ނުވި ނަމަވެސް، ހަށިގަނޑުގެ އެކި ތަންތަނަށް އެކިވަރުގެ ޒަހަމްތައް ލިބިފައިވާ ކަމަށާއި އެ މީހާ ފެނުނުއިރު އޮތީ ހޭނެތިފައި ކަމަށް އެ ރަށުން ވާހަކަ ދެއްކި މީހަކު ބުންޏެވެ.
މި ހާދިސާއާ ގުޅިގެން ފުލުހުން ބުނީ އަނިޔާވި މީހާއަށް ހޮސްޕިޓަލުގައި ފަރުވާދެމުން އަންނަ ކަމަށެވެ. އަދި ފުލުހުންނާއި ކަމާބެހޭ އިދާރާތަކުން މި މައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރަމުން އަންނަ ކަމަށްވެސް ފުލުހުން ވަނީ ބުނެފައެވެ.
