މެދުއިރުމަތީގެ ހަނގުރާމައިގެ ތެރެއިން ވައިގެ މަގުން ދެމުންދާ ޙަމަލާތައް އިންތިހާއަށް އިތުރުވެއްޖެއެވެ. އެމެރިކާގެ ސެންޓްކޮމް އިން 5 ގަޑިއިރު ވަންދެން އީރާނަށް ދިން ވަރުގަދަ ޙަމަލާތަކަށްފަހު، އީރާނުގެ އައި.އާރު.ޖީ.ސީ އިން ވަނީ އުރުދުންގައި ޤާއިމުކޮށްފައިވާ އެމެރިކާގެ އަސްކަރީ އެއާ ބޭހަކަށް އަމާޒުކޮށް ބެލިސްޓިކް މިސައިލް ޙަމަލާތަކެއް ދީފައެވެ.
ރޮއިޓާސްއިން ރިޕޯޓުކުރާ ގޮތުގައި އެމެރިކާއިން ވަނީ ޖެހިޖެހިގެން 3 ރޭ އީރާނުގެ ދެކުނުގެ ސަރަހައްދުތަކަށް ބޮންއަޅާފައެވެ. އެންމެ ފަހުގެ ޙަމަލާތައް މެދުކެނޑުމެއްނެތި 5 ގަޑިއިރު ވަންދެން ކުރިއަށްދިޔައިރު، މައިގަނޑު އަމާޒަކީ އީރާނުގެ ރާޑަރުތަކާއި މިސައިލް ސްޓޭޝަންތައް ހަލާކުކޮށްލުމެވެ.
އީރާނުން އުރުދުންގައި ހުރި އެމެރިކާގެ ބޭސްއަށް ދިން ޙަމަލާތަކުގެ ތެރެއިން 4 މިސައިލެއް އުރުދުންގެ އަސްކަރިއްޔާއިން ވަނީ ވައްޓާލާފައެވެ. އީރާނުން ވަނީ އުރުދުންގެ ރައްޔިތުންނާ އެއްވެސް ރުޅިވެރިކަމެއް ނެތްކަމަށާއި، ނަމަވެސް އެމެރިކާގެ ބޭސްތައް އެ ޤައުމުން ބޭރުކުރުމަށް ގޮވާލާފައެވެ.
