ސަރުކާރުގެ ބޭސް ކުންފުނި، ސްޓޭޓް ފާމާގެ މައިގަނޑު މަގުސަދަކީ ވިޔަފާރި ނަފާ އިތުރުކުރުމަށްވުރެ ބޮޑަށް، ރައްޔިތުންނަށް އެއްވެސް ދަތިކަމެއް ނެތި ބޭސް ލިބޭނެ އިންތިޒާމު ހަމަޖައްސައިދިނުން ކަމަށް އެ ކުންފުނީގެ މެނޭޖިންގ ޑިރެކްޓަރު ޑރ. ޝާހު މާހިރު ވިދާޅުވެއްޖެއެވެ.
ދިވެހިރާއްޖޭގެ އަޑުން ގެނެސްދިން ޕްރޮގްރާމެއްގައި ވާހަކަދައްކަވަމުން ޑރ. ޝާހު ވިދާޅުވީ، ރާއްޖެއަށް ބޭނުންވާ ބޭހާއި ސިއްހީ އާލާތްތައް ގަނޑުކޮށް ރާއްޖެ އެތެރެކޮށް، ރައްޔިތުންނަށް ފޯރުކޮށްދިނުމަކީ އެ ކުންފުނީގެ މައިގަނޑު ޒިންމާ ކަމަށެވެ. ބޭސް ލިބުމުގައި ދިމާވާ ދަތިތަކަކީ ޒަމާނުއްސުރެ ރައްޔިތުންނަށް ކުރިމަތިވެފައިވާ ބޮޑު ގޮންޖެހުމެއްކަން ފާހަގަކުރައްވައި، އެކަމަށް ދާއިމީ ހައްލެއް ހޯދުމަށް ކުންފުނިން ބުރަ މަސައްކަތްތަކެއް ކުރަމުންދާ ކަމަށް އޭނާ ވިދާޅުވިއެވެ.
އެގޮތުން، ބޭހުގެ ރައްކާތެރިކަމާއި ފޯރުކޮށްދިނުމުގެ ނިޒާމު ހަރުދަނާކުރުމަށްޓަކައި ޒަމާނީ ޑިޖިޓަލް ވަސީލަތްތަކުގެ އެހީގައި ސްޓޮކް އަދި ސަޕްލައި ޗެއިން މެނޭޖްމަންޓް ސިސްޓަމެއް ގާއިމުކުރަމުންދާކަން ޑރ. ޝާހު ފާހަގަކުރެއްވިއެވެ. މީގެ އިތުރުން، މިހާރު ރާއްޖެއިން ނުލިބޭ ބޭސްތައް ހޯދުމަށް ޕްރިސްކްރިޕްޝަނަށް އޯޑަރުކުރާ އުސޫލުގެ ބަދަލުގައި، ކުރިއަށް އޮތް ތަނުގައި ރާއްޖެއަށް ބޭނުންވާ ބޭހުގެ މިންވަރު ދުރާލާ އަންދާޒާކޮށް، ދިގު މުއްދަތަށް ބޭނުންވާ ބޭސް ރާއްޖެއަށް އެތެރެކޮށްފައި ބެހެއްޓުމަށް ރާވާފައިވާ ކަމަށްވެސް އޭނާ ވިދާޅުވިއެވެ.
ޑރ. ޝާހު އިތުރަށް ވިދާޅުވީ، ކުންފުނީގެ ހުރިހާ މަސައްކަތެއްގައިވެސް އެންމެ ބޮޑު އިސްކަމެއް ދޭނީ މާލީ ފައިދާއަށްވުރެ ބޮޑަށް، އާންމު ރައްޔިތުންނަށް ބޭނުންވާ ހުރިހާ ބޭހެއް ފަސޭހަކަމާއެކު ލިބޭނެ މަގު ތަނަވަސްކޮށްދިނުމަށް ކަމަށެވެ.
ސްޓޭޓް ފާމާއަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ހާއްސަ ގަރާރަކުން މިދިޔަ އަހަރުގެ ސެޕްޓެމްބަރު މަހު އުފެއްދެވި ކުންފުންޏެކެވެ. މީގެކުރިން އެސްޓީއޯގެ ދަށުން ހިންގަމުން އައި ބޭސް ފިހާރަތަކާއި މުވައްޒަފުން، މި ހިނގާ ޖުލައި މަހުގެ 1 ވަނަ ދުވަހުން ފެށިގެން ވަނީ ރަސްމީކޮށް ސްޓޭޓް ފާމާގެ ދަށަށް ބަދަލުކޮށްފައެވެ.
