އީރާނުގެ އެންމެ މުހިންމު ނިއުކްލިއާ މަރުކަޒު ހުންނަ ބޫޝެހެރު، އެ ސިޓީއާ ކައިރީގައި އޮންނަ ޗޮޣާދަކް، އަދި ހުރުމްޒް ކަނޑުއޮޅީގައި އޮންނަ ޤޭޝްމް ޖަޒީރާއަށް ބާރުގަދަ ގޮވުންތަކެއްގެ އަޑު އިވި، މުޅި ސަރަހައްދު ސަލާމަތީ ނުރައްކަލެއްގެ ތެރެއަށް ވެއްޓިއްޖެއެވެ.
ބޫޝެހެރަކީ އީރާނުގެ އެންމެ ބޮޑު އަދި ހަމައެކަނި ހިންގަމުންދާ ނިއުކްލިއާ ޕަވަރ ޕްލާންޓް ހުންނަ ސަރަހައްދެވެ. މި ހަމަލާތަކުގައި ނިއުކްލިއާ ރިއެކްޓަރަށް ގެއްލުމެއް ލިބުނުކަން އަދި ކަށަވަރުވެފައި ނުވި ނަމަވެސް، މި ސަރަހައްދަށް ހަމަލާދިނުމަކީ ބައިނަލްއަޤްވާމީ ދުނިޔެއިން އިންތިހާއަށް ކަންބޮޑުވާ ކަމެކެވެ. އީރާނުގެ ’ފާރްސް ނިއުސް އެޖެންސީ‘ އާ ހަވާލާދީ ރޮއިޓާސްއިން ރިޕޯޓުކޮށްފައިވާ ގޮތުގައި، މި ގޮވުންތަކުގެ ބާރުގަދަކަމުން އެ ސަރަހައްދުގެ ގޭގޭގެ ކުޑަދޮރުތައް ވަނީ ގުޑައިގެން ގޮސްފައެވެ.
ހަމައެއާއެކު، ހުރުމްޒް ކަނޑުއޮޅީގެ ސްޓްރެޓީޖިކް ސަރަހައްދެއް ކަމަށްވާ ޤޭޝްމް ޖަޒީރާއަށް ވެސް ވަނީ ގޮވުންތަކެއްގެ އަޑު އިވިފައެވެ. މި ގޮވުންތަކުގެ ސީދާ ސަބަބު އަދި ކަށަވަރުނުވި ނަމަވެސް، މިއީ އީރާނުގެ އަސްކަރީ މަރުކަޒުތައް ހުންނަ މުހިންމު ރަށެކެވެ.
ރިޕޯޓުތައް ބުނާގޮތުގައި ޗޮޣާދަކް މަތިން ގޮވުންތަކުގެ އަޑާއެކު އީރާނުގެ އެއާ ޑިފެންސް ނިޒާމުތަކުން ވަނީ ރައްދުގައި މިސައިލްތައް ފޮނުވާފައެވެ. މި ގޮވުންތައް އިވިފައިވަނީ އެމެރިކާއިން އީރާނުގެ ބަނދަރުތައް ބަންދުކޮށް، ހުރުމްޒް ކަނޑުއޮޅީގެ ކޮންޓްރޯލް ނެގުމަށް ވަރުގަދަ އަސްކަރީ އޮޕަރޭޝަންތަކެއް ހިންގަމުންދާ ދަނޑިވަޅެއްގައެވެ.
