ދައުލަތުގެ ބެލުމުގެ ދަށުގައި ތިބޭ ފަރާތްތަކާއި، ކުށުގެ ތުހުމަތުގައި ބަންދުކޮށްފައި ތިބޭ މީހުންގެ އިތުރުން ޖަލު ހުކުމް ތަންފީޒުކުރަމުންދާ ފަރާތްތަކަށް އިންސާނުންގެ ގުނަވަން ހަދިޔާ ނުކުރެވޭ ގޮތަށް، އިންސާނުންގެ ގުނަވަން ޓްރާންސްޕްލާންޓްކުރުމުގެ ބިލު ރައްޔިތުންގެ މަޖިލީހުގެ އިޖުތިމާއީ ކޮމިޓީން ފާސްކޮށްފިއެވެ.
މި ބިލަށް މުހިންމު ބަދަލުތަކެއް ގެނެސްފައި މިވަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މި ބިލު ތަސްދީގު ނުކުރައްވައި، އަލުން ދިރާސާކުރެއްވުމަށް މަޖިލީހަށް އަނބުރާ ފޮނުއްވައިލެއްވުމާ ގުޅިގެންނެވެ.
ބިލަށް ގެނެވުނު އެންމެ ފާހަގަކޮށްލެވޭ އެއް ބަދަލަކީ، ގުނަވަން ހަދިޔާކުރާ ފަރާތްތަކުގެ ޝަރުތުތަކަށް އިތުރުކުރި ހަރުދަނާ އުސޫލެވެ. ބިލުގެ 7 ވަނަ މާއްދާގެ (ށ) އަށް ގެނައި މި އިސްލާހާއެކު، ދައުލަތުގެ ބެލުމުގެ ދަށުގައި ހުރި މީހަކަށް ނުވަތަ ޖަލު ހުކުމެއް ތަންފީޒުކުރަމުންދާ މީހަކަށް ގުނަވަން ހަދިޔާކުރުމުގެ ފުރުސަތު ބަންދުވާނެއެވެ. މިއީ ގުނަވަން ހަދިޔާކުރުމުގެ ނިޒާމުގެ ތެރެއަށް ނުފޫޒު ވަނުމާއި، މަޖުބޫރުކުރުން ފަދަ ނޭދެވޭ އަމަލުތަކުން މުޖުތަމައު ރައްކާތެރިކުރުމަށް އެޅުނު މުހިންމު ފިޔަވަޅެކެވެ.
މީގެ އިތުރުން، ކުރިން ބިލުގައި ހިމަނާފައިވާ ’ގިސާސް ހިފުމުގެ‘ މާއްދާއަށް ވެސް ވަނީ ބޮޑު ބަދަލެއް ގެނެސްފައެވެ. މީހެއްގެ ރުހުމާ ނުލައި ގުނަވަނެއް ނަގައިފި ނަމަ ގިސާސް ހިފަން ޖެހޭ ގޮތަށް އޮތް އޮތުން ކޮމިޓީން މިހާރު ވަނީ އުނިކޮށްފައެވެ. މި ބަދަލު ގެނައީ، ރުހުމާ ނުލައި ގުނަވަން ނެގުމުގެ ހުރިހާ ހާލަތަކީ އިސްލާމީ ޝަރީއަތުގައި ގިސާސް ހިފުމުގެ ޝަރުތު ހަމަވާނެ ކަންކަމަށް ނުވެދާނެ ކަމަށް ރައީސުލްޖުމްހޫރިއްޔާ ފާހަގަކުރެއްވި ނުކުތާތަކަށް ރިއާޔަތްކުރުމަށްފަހުގައެވެ. މިއީ ޝަރުއީ ހަމަތަކުން ބޭރުން ގިސާސް ތަންފީޒުވިޔަ ނުދިނުމަށްޓަކައި ގެނެވުނު އިސްލާހެކެވެ.
ކުށުގެ އަދަބުތަކަށް ބަލާއިރު، ޖޫރިމަނާއާއި ޖަލު ހުކުމުގެ މިންވަރުތަކަށް ވެސް ވަނީ ލުއިތަކެއް ގެނެސްފައެވެ. އެގޮތުން، ކުރިން އޮތް 250,000 އާއި 500,000 ރުފިޔާއާ ދެމެދުގެ ޖޫރިމަނާ، 150,000 އާއި 250,000 ރުފިޔާއާ ދެމެދަށް ވަނީ ކުޑަކޮށްފައެވެ. އަދި ޖަލު ހުކުމުގެ މުއްދަތު 12 މަހާއި 18 މަހާ ދެމެދުގެ މުއްދަތަކަށް ވަނީ ބަދަލުކޮށްފައެވެ. މި ބަދަލުތަކާއެކު ބިލުގެ 66 ވަނަ މާއްދާ މިހާރު އޮތީ ސަރުކާރުން އެންމެ ފުރަތަމަ ހުށަހެޅި އަސްލު ބިލުގައި އޮތް މިންގަނޑުތަކަށެވެ.
