ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ޖަލަށްލައި، ނުހައްގުން އަނިޔާދިނީ ކުރީގެ ރައީސް އިބްރާހިމް މުޙައްމަދު ޞާލިޙު ކަމަށާއި ނަމަވެސް، ރައީސް މުޢިއްޒު އެފަދަ ކަމެއް ކުރައްވާނެ ކަމަށް ގަބޫލުނުކުރައްވާ ކަމަށް އެމަނިކުފާނު ރޭ ވިދާޅުވެއްޖެއެވެ.
ރައީސް ޔާމީން މިމޭރުމުން ވިދާޅުވީ، ޕީޕަލްސް ނޭޝަނަލް ފްރަންޓް (ޕީއެންއެފް) ގެ އޮފީހުގައި ރޭ ބޭއްވި ޖަލްސާގައި ވާހަކަދައްކަވަމުންނެވެ. މި ޖަލްސާގައި ބައިވެރިވި ބައެއް ފަރާތްތަކުން ވަނީ، ކުރިއަށް އޮތް ރިޔާސީ އިންތިހާބުގައި ރައީސް މުއިއްޒާ ވާދަކުރައްވަން ޔާމީން ނުކުންނަވާފާނެ ކަމުގެ ބިރުވެރިކަމުގައި، އެމަނިކުފާނު އަލުން ޖަލަށްލާން އުޅޭ ކަމަށް ބުނެ ވާހަކަތަކެއް ދައްކާފައެވެ.
އެ މައުލޫއަށް ވާހަކަދެކެވެމުން ދަނިކޮށް، އެ ވާހަކަތައް މެދުކަނޑާލައްވައި ޔާމީން ވިދާޅުވީ، އެމަނިކުފާނު ޖަލުގައި ގެންގުޅުމުގެ ވިސްނުން ރައީސް މުޢިއްޒު ގެންގުޅުއްވާ ކަމަށް ގަބޫލުނުކުރައްވާ ކަމަށެވެ. ނަމަވެސް އެމަނިކުފާނު ޖަލަށްލުމުގެ ވިސްނުން ގެންގުޅުނީ އެމްޑީޕީއާއި ކުރީގެ ރައީސް ޞާލިޙު ކަމަށް ޔާމީން ވަނީ ވިދާޅުވެފައެވެ.
”އަޅުގަނޑު ޖަލުގައި ގެންގުޅުނީ ރައީސް މުޢިއްޒެއް ނޫން. އަޅުގަނޑު ޖަލުގައި ގެންގުޅުނީ ކުރީގެ ރައީސް އިބްރާހިމް މުޙައްމަދު ޞާލިޙު،“ – ޔާމީން ވިދާޅުވިއެވެ.
ޔާމީން އިތުރަށް ވިދާޅުވީ، ޞާލިޙު އެކަން އެގޮތަށް ކުރެއްވީ، އެމަނިކުފާނު ޖަލުގައި ބާއްވައިގެން ނޫނީ ދެވަނަ ދައުރެއް ކާމިޔާބު ނުކުރެވޭނެ ކަމަށް ކަހީނަކު ލަފާދިނުމުން ކަމަށެވެ. ނަމަވެސް، ރައީސް މުޢިއްޒަކީ ކަންކަމުގައި ހިސާބުތަކެއް ޖައްސަވައިގެން އުޅުއްވާ ބޭފުޅަކަށް ވާތީ، އެފަދަ ނިންމެވުމެއް އެމަނިކުފާނު ނިންމަވާނެ ކަމަށް ގަބޫލުނުކުރައްވާ ކަމަށެވެ.
އެމްއެމްޕީއާރުސީގެ ހިޔާނާތުގެ މައްސަލައިގައި 11 އަހަރުގެ ޖަލު ހުކުމެއް ތަންފީޒުކުރައްވަމުން ގެންދަވަނިކޮށް، ރައީސް ޔާމީން ގެއަށް ބަދަލުކުރެވުނީ ރައީސް މުޢިއްޒު ވެރިކަމާ ހަވާލުވެވަޑައިގަތުމާ ގުޅިގެންނެވެ. ނަމަވެސް އޭގެ ދުވަސްކޮޅެއް ފަހުން އަމިއްލައަށް ޕީޕީއެމްއިން ވަކިވެވަޑައިގެން އަމިއްލަ ޕާޓީއެއް އުފައްދަވައި މި ސަރުކާރަށް އަންނަނީ ވަރަށް ބޮޑަށް ފާޑު ވިދާޅުވަމުންނެވެ.
