ޔޫކޭގައި ދިރިއުޅޭ ޔަހޫދީންނާ ދެކޮޅަށް ހިންގާ ހަމަލާތައް އިތުރުވުމާ ގުޅިގެން، އެ މީހުންގެ ރައްކާތެރިކަން ކަށަވަރުކުރުމަށް ކުރިއަށް އޮތް ތިން އަހަރު ދުވަހުގެ ތެރޭގައި 250 މިލިއަން ޕައުންޑް (334.4 މިލިއަން ޑޮލަރު) ޚަރަދުކުރަން އިނގިރޭސި ސަރުކާރުން ނިންމައިފިއެވެ.
މި ފައިސާ ޚަރަދުކުރާނީ ޔަހޫދީންގެ ސްކޫލުތަކާއި، އަޅުކަންކުރާ ފައްޅިތަކާއި އަދި ކޮމިއުނިޓީ ސެންޓަރުތަކުގެ ސަލާމަތީ ފިޔަވަޅުތައް ވަރުގަދަކުރުމަށެވެ. މީގެ ތެރޭގައި ސަލާމަތީ ބަލަހައްޓާ މީހުން އިތުރުކުރުމާއި، ކޮމިއުނިޓީ ސޭފްޓީ ޕްރޮގްރާމްތައް ހިންގުން ހިމެނެއެވެ.
ދެފުށް ދެގޮތް ސިޔާސަތުތަކަށް ފާޑުކިޔުން
އެއްވެސް ދީނަކަށް ނުވަތަ ނަސްލަކަށް ނިސްބަތްވާ ބަޔަކު ބިރުވެރިކަމެއްގެ ތެރޭގައި ދިރިއުޅެން ނުޖެހޭނެ ކަމަށް އިނގިރޭސި ސަރުކާރުން ބުނަމުންދިޔަނަމަވެސް ގިނަ ބަޔަކު ދެކޭގޮތުގައި، އިސްލާމްފޯބިއާ (މުސްލިމުންނާ ދެކޮޅަށް ނަފްރަތު އުފެއްދުން) ޔޫކޭގައި އިންތިހާއަށް އިތުރުވެފައިވީ ނަމަވެސް، އެކަމާ ދެކޮޅަށް ސަރުކާރުން އެއްވެސް ފިޔަވަޅެއް ނާޅައެވެ. އަދި ޔަހޫދީންގެ ރައްކާތެރިކަމަށް ޚާއްސަ އަހައްމިއްޔަތުކަމެއް ދޭއިރު، ފަލަސްތީނުގެ ހައްގުގައި އަޑުއުފުލާ ފަރާތްތަކުގެ އަޑު ކަނޑުވާލައި، އިޒްރޭލުން ހިންގާ ގަތުލުއާންމުތަކާ ދެކޮޅަށް ކުރާ އެކްޓިވިޒަމް ހުއްޓުވަން ސަރުކާރުން މަސައްކަތްކުރާ ކަމަށް ފާޑުކިޔާ ފަރާތްތަކުން ބުނެއެވެ.
އިޒްރޭލުން ހިންގާ ޤަތުލުޢާންމަށް އިނގިރޭސިވިލާތުގެ އަސްކަރީ އެހީތެރިކަން
އެތެރޭގެ ސަލާމަތީ ކަންކަމަށް އިނގިރޭސި ސަރުކާރުން ބޮޑެތި ޚަރަދުތަކެއް ކުރަމުންދިޔަ ނަމަވެސް، ޣައްޒާގައި އިޒްރޭލުން ހިންގަމުންދާ ނަސްލުހޭދުއަށް (ޖެނޮސައިޑަށް) އިނގިރޭސިވިލާތުން އަސްކަރީ ގޮތުން ވާގިވެރިވަމުންދާތީ، އިންސާނީ ޙައްޤުތަކަށް މަސައްކަތްކުރާ ބައިނަލްއަޤްވާމީ ޖަމާޢަތްތަކުން ދަނީ އެ ޤައުމަށް ވަރަށް ބޮޑަށް ފާޑުކިޔަމުންނެވެ.
ތަފާސްހިސާބުތަކުން ދައްކާގޮތުގައި 2015 އިން ފެށިގެން 2025 ގެ މާރިޗު މަހާ ހަމައަށް އިނގިރޭސިވިލާތުން ވަނީ އިޒްރޭލަށް 634 މިލިއަން ޕައުންޑްގެ އަސްކަރީ ހަތިޔާރު ވިއްކުމުގެ ލައިސަންސް ދޫކޮށްފައެވެ. މީގެ ތެރޭގައި އެންމެ ފާހަގަކޮށްލެވެނީ، ޣައްޒާއަށް ބޮންއެޅުމަށް އިޒްރޭލުން ބޭނުންކުރާ އެފް-35 މަރުކާގެ ފައިޓަރ ޖެޓްތަކުގެ ބައިތަކުގެ 15 އިންސައްތައަކީ އިނގިރޭސިވިލާތުން އުފައްދާ ތަކެތި ކަމަށްވުމެވެ. 2024 ވަނަ އަހަރުގެ ސެޕްޓެމްބަރު މަހު އިނގިރޭސިވިލާތުން އިޒްރޭލަށް ހަތިޔާރު ވިއްކުމުގެ 30 ލައިސަންސެއް މަޑުޖައްސާލި ނަމަވެސް، އެމެރިކާ ފަދަ ތިންވަނަ ޤައުމެއް މެދުވެރިކޮށް އެފް-35 ގެ ބައިތައް އިޒްރޭލަށް ފޯރުކޮށްދިނުން އިނގިރޭސި ސަރުކާރުން ހުއްޓާލާފައެއް ނުވެއެވެ.
