މަތީ ސާނަވީގައި ތައުލީމު ހާސިލުކުރާ ދަރިވަރުންގެ ނިސްބަތް 48 އިންސައްތައަށް އިތުރުކުރެވިފައިވާ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވެއްޖެއެވެ.
މަތީ އަރުތަވެރިންނަށް އިނާމު ދިނުމަށް ބޭއްވި ޝަރަފުވެރި ޖަލްސާގައި ވާހަކަދައްކަވަމުން މިނިސްޓަރު ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވިއިރު، ގްރޭޑް 10 ނިންމާ ދަރިވަރުންގެ ތެރެއިން އޭލެވެލްއަށް ކިޔަވަން ފުރުސަތު ލިބެނީ އެންމެ 34 އިންސައްތަ ދަރިވަރުންނަށް ކަމަށެވެ. ނަމަވެސް، މި ސަރުކާރުގެ ހަރުދަނާ ސިޔާސަތުތަކުގެ ސަބަބުން މިހާރު މި އަދަދު 48 އިންސައްތައަށް އިތުރުވެފައިވާކަން މިނިސްޓަރު ފާހަގަކުރެއްވިއެވެ.
މިނިސްޓަރު ވިދާޅުވި ގޮތުގައި، ސަރުކާރުގެ އަމާޒަކީ ވޮކޭޝަނަލް ހައި ސްކޫލްގެ ދަރިވަރުންނާއެކު، 2028 ވަނަ އަހަރާ ހަމައަށް މަތީ ސާނަވީގައި ކިޔަވާ ކުދިންގެ ނިސްބަތް 65 އިންސައްތައަށް އިތުރުކުރުމެވެ.
”ކުރިން އޯލެވެލް ނިންމާ ކުދިންގެ ތެރެއިން އޭލެވެލްއަށް ދެވެނީ ގާތްގަނޑަކަށް ތިންބައިކުޅަ އެއްބައި ކުދިންނަށް. އެހެންނަމަވެސް، ތައުލީމީ ސިޔާސަތަށް ގެނެވުނު އީޖާދީ ބަދަލުތަކާއެކު މިހާރު މިވަނީ 48 އިންސައްތައަށް އެ އަދަދު އިތުރުކުރެވިފައި. މިއީ ގައުމީ ފެންވަރުގައި ލިބުނު ވަރަށް ބޮޑު ކުރިއެރުމެއް،“ – މިނިސްޓަރު ވިދާޅުވިއެވެ.
މަތީ ސާނަވީގެ ފުރުސަތުތައް ފުޅާކުރުމުގެ ގޮތުން، ގްރޭޑް 11 އަށް ވަނުމަށް ކަނޑައަޅާފައިވާ މިންގަނޑުތަކަށް މިދިޔަ އަހަރު ވަނީ ބަދަލުތަކެއް ގެނެސްފައެވެ. މިހާރު އޭލެވެލްއަށް ވަދެވޭނެ ތިން މަގެއް ވަނީ ފަހިކޮށްދީފައެވެ. އެއީ އެކަޑަމިކް ސްޓްރީމާއި، ސްކޫލްތަކުގައި ކުރިއަށްގެންދާ ފަންނީ ތައުލީމު (ވޮކޭޝަނަލް އެޑިޔުކޭޝަން) އަދި އަމަލީ މަސައްކަތުގެ މާހައުލުން އުނގެނިދޭ އެޕްރެންޓިޝިޕް ޕްރޮގްރާމްތަކެވެ.
