ރައްޔިތުންގެ މަޖިލީހުގެ ޖަލްސާތަކުގައި އާދަކޮށް އައްޑޫ ބަހުރުވައިން މިނިސްޓަރުންނާ ސުވާލުކުރައްވާ ހިތަދޫ އުތުރު ދާއިރާ ތަމްސީލުކުރައްވާ މެންބަރު ޢަބްދުﷲ ސޯދިގު (ސޯބެ) އަށް، ހައުސިންގ މިނިސްޓަރު ޑރ. ޢަބްދުﷲ މުއްޠަލިބު ހުވަދޫ ބަހުރުވައިން ޖަވާބުދެއްވައިފިއެވެ.
ރައްޔިތުންގެ މަޖިލީހަށް އިންތިހާބުވެވަޑައިގަތް ފަހުން، ސޯބެ ގެންދަވަނީ ރައްޔިތުންގެ މަޖިލީހުގެ ޖަލްސާތަކުގައި މުޅިންވެސް އައްޑޫ ބަހުރުވައިން ވާހަކަދައްކަވަމުންނެވެ. މިކަމުގެ ސަބަބުން ބައެއް މިނިސްޓަރުންނަށް ސުވާލުތައް ފަހުމުނުވެ، ޖަވާބުދެއްވުމަށް ދަތިވާކަން ފާހަގަކޮށްލެވެއެވެ. ސޯބެ މިނިސްޓަރާ ސުވާލުކުރެއްވީ ފެނަކައިގެ ފެން ޕްލާންޓަށް މައްސަލަ ޖެހި، ފެނުގެ ހިދުމަތަށް ބުރޫއަރަމުންދާ މައްސަލައާއި، އައްޑޫ ހިތަދޫގައި ސަރުކާރުން ތަރައްގީކުރާ ހައުސިންގ ޔުނިޓުތަކުގެ މަސައްކަތް ހުއްޓިފައިވާތީ އެ މަސައްކަތް އަލުން ފަށާނެ ތާރީހަކާ ގުޅޭގޮތުންނެވެ.
ސޯބެ އައްޑޫ ބަހުރުވައިން ސުވާލުކުރެއްވުމުން، މިނިސްޓަރު މުއްޠަލިބު ވަނީ އައްޑޫ ބަހުރުވައިން ވާހަކަދެއްކެވީމަ ހުވަދޫ ބަހުރުވައިން ޖަވާބުދެއްވުން އެންމެ ރަނގަޅުތޯ ސޯބެގެ އަރިހުން އައްސަވާފައެވެ. އަދި އެގޮތް އެންމެ ރަނގަޅު ނަމަ ހުވަދޫ ބަހުރުވައިން ކުރިއަށްގެންދަވާނެ ކަމަށް މިނިސްޓަރު ވިދާޅުވިއެވެ. މިނިސްޓަރު މުއްޠަލިބަކީ ގދ. ފިޔޯރީއަށް އުފަން ބޭފުޅެކެވެ.
”އައްޑޫ ބަހުން ވާހަކަދެއްކެވީމާ އަޅުގަނޑުު ޖަވާބު ދޭންވީ ހުވަދޫ ބަހުންތޯ؟ ހުވަދޫ ބަހުން އަޅުގަނޑު ކުރިއަށްގެންދާނަން،“ – މިނިސްޓަރު މުއްޠަލިބު ވިދާޅުވިއެވެ.
ސޯބެގެ ސުވާލުތަކަށް ޖަވާބުދެއްވަމުން މިނިސްޓަރު ވިދާޅުވީ، ފެނުގެ ނިޒާމު ރަނގަޅުކުރުމަށްޓަކައި މި ސަރުކާރުން އެމްޑަބްލިއުއެސްސީއާ ހަވާލުކޮށްގެން ބޮޑެތި މަސައްކަތްތަކެއް ކުރަމުންދާ ކަމަށެވެ. އަދި ފެން ހޮޅިތަކަށް މައްސަލަ ދިމާވެގެން އުޅެނީ ކުރީ ސަރުކާރުގެ ސްޓޭޓް މިނިސްޓަރަކަށް ސޯދިގު ހުންނެވިއިރު މަގު ހެދުމުގެ މަސައްކަތް ކުރިއަށް ގެންދިޔަ ގޮތުންކަން ފާހަގަކުރައްވައި މިނިސްޓަރު ވަނީ ހުވަދޫ ބަހުރުވައިން ހޫނު ރައްދެއް ދެއްވާފައެވެ.
”ހީވަނީ މެންބަރު ވެސް ކޮންމެވެސް ވަރަކަށް ޒިންމާ ނަގަންޖެހޭ ކަމެއްހެން މިކަމަކީ،“ – މިނިސްޓަރު ވިދާޅުވިއެވެ.
ރައްޔިތުންގެ މަޖިލީހުގެ ޖަލްސާތަކުގައި އައްޑޫ ބަހުރުވައިން ވާހަކަދައްކަވާ ސޯބެ މީގެ ކުރިން ވިދާޅުވީ، އޭނާއަށް މާލޭ ބަހުރުވަ ނޭނގޭ ކަމަށާއި އަދި މާލޭ ބަހުރުވަ މިހާރު ދަސްކުރަމުންދާ ކަމަށެވެ. ނަމަވެސް، މީގެ ކުރިން މާލޭ ބަހުރުވައިން ފަރިތަކަމާއެކު ސޯބެ ވާހަކަދައްކަވާފައިވާ ވީޑިއޯތައް މީސް މީޑިއާގައި ދައުރުވަމުންދާތީ، އޭނާ މަޖިލީހުގައި މިގޮތަށް ކަންތައް ކުރައްވަނީ މިނިސްޓަރުންނަށް ޖެއްސުން ކުރުމުގެ ނިޔަތުގައި ކަމަށް ގިނަ ބަޔަކު އަންނަނީ ބުނަމުންނެވެ.
