އައްޑޫ ސިޓީ ލިންކް ރޯޑް ޒަމާނީ ފެންވަރަށް ތަރައްގީކުރުމުގެ ބިޔަ މަޝްރޫއުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ހުއްޓުމެއްނެތި ކުރިއަށްގެންދާ ކަމަށް ހައުސިންގ މިނިސްޓަރު ޑރ. ޢަބްދުﷲ މުއްޠަލިބު މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ހިތަދޫ މެދު ދާއިރާ ތަމްސީލުކުރައްވާ މެންބަރު އަޙްމަދު އަޒާން ކުރެއްވި ސުވާލަކަށް ޖަވާބުދެއްވަމުން މިނިސްޓަރު މުއްޠަލިބް ވިދާޅުވީ، އައްޑޫ ސިޓީ ލިންކް ރޯޑަކީ އައްޑޫގެ ރަށްތައް ގުޅުވައިދޭ ހަމައެކަނި މަގަށްވެފައި، ބަދަލުގައި ބޭނުންކުރާނެ އެހެން މަގެއް ނެތުމަކީ މަސައްކަތް ކުރިއަށް ގެންދިއުމުގައި އޮތް ގޮންޖެހުމެއް ކަމަށެވެ. އެހެންކަމުން، މަސައްކަތް ކުރިއަށް ގެންދަނީ އާންމު ދަތުރުފަތުރަށް ބުރޫނާރާނެހެން ރޭވުންތެރިކަމާއެކުގައި ކަމަށް މިނިސްޓަރު ވިދާޅުވިއެވެ.
”އަޅުގަނޑުމެން އެ މަގު ހަދާއިރުގައި ވިސްނާލަންޖެހޭނީ އެއް ފަރާތް ހަދާފައި، ހުޅުވާފައި، އަނެއް ފަރާތް ހެދުމުގެ ކަންތައްވެސް. ރައްޔިތުންނަށް އެ މަގު ބޭނުން ނުކުރެވޭ ގޮތަށް އެއްކޮށް ބަންދުކޮށްގެން ނުކުރެވޭނެކަން،“ – މިނިސްޓަރު ވިދާޅުވިއެވެ.
މި މަޝްރޫއުގެ ދަށުން މިހާރު ދެ ލޭނަށް އޮތް ބައެއް ސަރަހައްދުތައް ހަތަރު ލޭނަށް ބަދަލުކޮށް، މަގު ފުޅާކުރުމަށް ވަނީ ހަމަޖެހިފައެވެ. މިނިސްޓަރު ފާހަގަކުރެއްވި ގޮތުގައި މިވަގުތު އެންމެ ބޮޑު އިސްކަމެއް ދެނީ މަގު ފުޅާކުރުމަށްފަހު ދުއްވާ ސަރަހައްދު ނުވަތަ ކެރިއޭޖްވޭގެ މަސައްކަތް ނިންމުމަށް ކަމަށާއި ސައިޑްވޯކްތަކުގެ މަސައްކަތް ކުރިއަށްދާނީ އޭގެ ފަހުން ކަމަށެވެ.
ސަރުކާރުން މި މަޝްރޫއަށް ވަރަށް ބޮޑު އަހައްމިއްޔަތުކަމެއް ދެއްވާކަން ފާހަގަކުރައްވަމުން މިނިސްޓަރު ވިދާޅުވީ، އިއްޔެވެސް ރައީސް މުޢިއްޒާއި އާރްޑީސީގެ މެނޭޖިންގ ޑިރެކްޓަރާއެކު މި މަޝްރޫއާ ގުޅޭގޮތުން މަޝްވަރާތަކެއް ކުރެވުނު ކަމަށެވެ. އަދި މަސައްކަތް ވީހާވެސް އަވަސް މިނެއްގައި ނިންމުމަށް ސަރުކާރުން ބާރުއަޅަމުންދާކަމުގެ ޔަގީންކަން މިނިސްޓަރު ދެއްވިއެވެ.
އައްޑޫ ސިޓީގެ ހިތަދޫ އިން ފެށިގެން ގަމާ ހަމައަށް ގުޅައިލަދޭ 16 ކިލޯމީޓަރުގެ މި ލިންކް ރޯޑަކީ 2001 ވަނަ އަހަރުން ފެށިގެން ބޭނުންކުރަމުން އަންނަ، މަގެކެވެ. މި މަގު ޒަމާނީ ފެންވަރަށް ތަރައްގީކުރުމަށް އާރުޑީސީއާ ހަވާލުކުރީ މިދިޔަ އަހަރުގެ އޭޕްރީލް މަހުގެ ތެރޭގައެވެ. ގާތްގަނޑަކަށް 829 މިލިއަން ރުފިޔާ ހަރަދުވާ މި ބިޔަ މަޝްރޫއު ނިންމުމަށް އެއްބަސްވުމުގައި ކަނޑައަޅާފައިވަނީ 1,440 ދުވަހުގެ މުއްދަތެކެވެ.
