ހިންޏައް ހަކުރު އޮޅުވާލާ ފަދައިން އެމެރިކާގެ ”މެދުވެރިކަމާއެކު“ ޤާއިމުކޮށްފައިވާ ކުޅޭކުޅޭ ”ހަމަލާ ބަދަލުކުރުން ހުއްޓާލުމުގެ“ އެއްބަސްވުމާ އެކުވެސް، އަނިޔާވެރި ޔަހޫދީ އިސްތިއުމާރު، އިޒްރޭލުން ޣައްޒާއަށް ދިން ނިރުބަވެރި ހަމަލާތަކެއްގައި އާދީއްތަ ދުވަހު މަދުވެގެން 5 ފަލަސްތީނު މީހުން ޝަހީދުކޮށްލައިފިއެވެ.
ސަބްރާ އަވަށުގައި ހުރި ދަގަނޑު މަސައްކަތްކުރާ ތަނަކަށް ޑްރޯން ހަމަލާއެއް ދީ، 4 މީހުން ޝަހީދުކޮށްލާފައިވެއެވެ. މެދުތެރޭ ޣައްޒާގައި އަލް-ބުރައިޖް ރެފިއުޖީ ކޭމްޕް ސަރަހައްދުގައި ހުރި 9 އަހަރުގެ ތަލާ އަބޫ މަތަރު އިޒްރޭލު ސިފައިން ދިން ބަޑީގެ ހަމަލާއެއްގައި ޝަހީދުކޮށްލާފައިވެއެވެ. ޣައްޒާގެ ދެކުނުން ޚާން ޔޫނިސްގެ މާވާސީ ސަރަހައްދުގައި ހުރި ވަގުތީ ހިޔާތަކަށް ދިން ހަމަލާއެއްގައި 1 މީހަކު ޝަހީދުވެ، އިތުރު ބަޔަކު ޒަހަމްވެފައިވެއެވެ.
އިޒްރޭލު ހައްދުފަހަނައަޅާފައިވާ އަސްކަރިއްޔާއިން ވަނީ ދަގަނޑު މަސައްކަތްކުރާ ތަނަށް ހަމަލާ ދިންކަން ކަށަވަރުކޮށްދީފައެވެ. ނަމަވެސް 9 އަހަރުގެ ކުއްޖާ ޝަހީދުވި ހާދިސާ އެނގިފައި ނުވާ ކަމަށް ބުނެފައިވެއެވެ. 2025 ވަނަ އަހަރުގެ އޮކްޓޯބަރު މަހުން ފެށިގެން ހަމަލާ ބަދަލުކުރުން ހުއްޓާލުމުގެ އެއްބަސްވުން އޮތް ނަމަވެސް، މިހާތަނަށް 1,000 އަށް ވުރެ ގިނަ ފަލަސްތީނު މުސްލިމުން އިޒްރޭލުގެ ޙަމަލާތަކުގައި ޝަހީދުކޮށްލާފައިވެއެެވެ.
