ބޭންކް އޮފް މޯލްޑިވްސް (ބީއެމްއެލް) އިން ކަސްޓަމަރުންގެ އެކި ބޭނުންތަކަށް ވޭތުވެދިޔަ ދެ އަހަރާއި ބައިގެ ތެރޭގައި ރެކޯޑް އަދަދަކަށް ބޭރު ފައިސާ ވިއްކާފައިވާކަން އެ ބޭންކުން ހާމަކޮށްފިއެވެ.
ބޭންކުން އާންމުކުރި ތަފާސްހިސާބުތައް ދައްކާގޮތުގައި، ޑޮލަރަށް އޮތް ޑިމާންޑް ބޮޑުވެ، ބޭންކުން ފޯރުކޮށްދިން ބޭރު ފައިސާގެ މިންވަރު ވަނީ އާދަޔާހިލާފަށް އިތުރުވެފައެވެ. އެގޮތުން 2024 ވަނަ އަހަރުގެ ޖަނަވަރީ މަހުން ފެށިގެން 2026 ވަނަ އަހަރުގެ ޖޫން މަހުގެ ނިޔަލަށް ބީއެމްއެލްއިން ވަނީ ކަސްޓަމަރުންނަށް ޖުމްލަ 1.7 ބިލިއަން ޑޮލަރު ވިއްކާފައެވެ. މިއީ އޭގެ ކުރީގެ ދެ އަހަރާއި ބައިގެ މުއްދަތާ އަޅައިބަލާއިރު 77 އިންސައްތަ ނުވަތަ 741 މިލިއަން ޑޮލަރުގެ އިތުރުވުމެކެވެ. ކުރީގެ އެ މުއްދަތުގައި ބޭންކުން ވިއްކާފައިވަނީ 957 މިލިއަން ޑޮލަރެވެ.
ހަމައެހެންމެ، ވޭތުވެދިޔަ ދެ އަހަރާއި ބައިގެ ތެރޭގައި ދިވެހި ރުފިޔާ އެކައުންޓުތަކުން ކުރި ކާޑު މުއާމަލާތްތަކަށް 870 މިލިއަން ޑޮލަރު ބޭންކުން ވަނީ ވިއްކާފައެވެ. މިއީ ކުރީގެ ދެ އަހަރާއި ބައިގެ މުއްދަތާ އަޅައިބަލާއިރު ދެގުނަ އިތުރު އަދަދެކެވެ. އެގޮތުން، 2021 ވަނަ އަހަރު ކާޑު މުއާމަލާތްތަކަށް މަހަކު އެވްރެޖްކޮށް 10.7 މިލިއަން ޑޮލަރު ވިއްކާފައިވާއިރު، މިއަހަރު އެ އަދަދު ވަނީ 37.8 މިލިއަން ޑޮލަރަށް އުފުލިފައެވެ.
ހަމައެއާއެކު، ޓީޓީ ފޮނުވުމަށް 2023 ވަނަ އަހަރު މަހަކު އެވްރެޖްކޮށް 10.2 މިލިއަން ޑޮލަރު ވިއްކިއިރު، މިއަހަރު އެ އަދަދު ވަނީ 28 މިލިއަން ޑޮލަރަށް އިތުރުވެފައެވެ.
ހަމައެހެންމެ، ރާއްޖޭން ބޭރުގައި ކިޔަވާ ކުދިންނަށާއި ބޭސްފަރުވާ ހޯދާ އާއިލާތަކަށް ބޭންކުން ވިއްކި ބޭރު ފައިސާގެ އަދަދު ވެސް ވަނީ ފާއިތުވި ހަތަރު އަހަރު ތެރޭގައި ފާހަގަކޮށްލެވޭ މިންވަރަކަށް އިތުރުވެފައެވެ. އެގޮތުން 2023 ވަނަ އަހަރު މަހަކަށް އެވްރެޖްކޮށް 2.9 މިލިއަން ޑޮލަރު ވިއްކާފައިވާއިރު 2024 ވަނަ އަހަރު މަހަކަށް އެވްރެޖްކޮށް ވިއްކާފައިވަނީ ހަތަރު މިލިއަން ޑޮލަރެވެ. އަދި މިދިޔަ 2025 ވަނަ އަހަރު މަހަކަށް އެވްރެޖްކޮށް ވިއްކާފައިވަނީ ފަސް މިލިއަން ޑޮލަރެވެ. މިއަހަރު މަހަކަށް އެވްރެޖްކޮށް ވިއްކާފައިވަނީ 5.8 މިލިއަން ޑޮލަރެވެ.
ދަތުރުވެރިންނަށް ނަގުދު ފައިސާގެ ގޮތުގައި ވިއްކި ޑޮލަރުގެ މިންވަރު ވެސް ވަނީ 70 އިންސައްތަ އިތުރުވެފައެވެ. ޖަނަވަރީ 2021 އިން ޑިސެންބަރު 2023 އަށް 155 މިލިއަން ޑޮލަރު ވިއްކާފައިވާއިރު، ޖަނަވަރީ 2024 އިން ޖޫން 2026 އަށް ވަނީ 264 މިލިއަން ޑޮލަރު ވިއްކާފައެވެ. މި އަހަރުގެ ފުރަތަމަ ހަ މަސްދުވަހު އެކަނިވެސް ދަތުރުވެރިންނަށް މަހަކު އެވްރެޖްކޮށް 8.5 މިލިއަން ޑޮލަރު ވިއްކާފައިވެއެވެ.
ޖުމްލަ ގޮތެއްގައި ބޭންކުން މަހެއްގެ މައްޗަށް ބޭރު ފައިސާ ވިއްކާ މިންވަރު ފާއިތުވި ފަސް އަހަރު ތެރޭގައި ވަނީ ހަތަރު ގުނަ އިތުރުވެފައެވެ. 2021 ވަނަ އަހަރު މަހަކު 21 މިލިއަން ޑޮލަރު ވިއްކިއިރު، 2026 ގެ ފުރަތަމަ ހަ މަސްދުވަހު މި އަދަދު ވަނީ މަހަކު 80 މިލިއަން ޑޮލަރަށް އަރާފައެވެ.
މި ހިސާބުތަކުން ހާމަވަނީ ރާއްޖޭގެ ބޭރު ފައިސާގެ ބޭނުންތައް ފުއްދައިދިނުމުގައި ބޭންކުން ބަހައްޓާ ސާބިތުކަމެވެ. ބޭރު ފައިސާއަށް އޮންނަ ޑިމާންޑް އެއްދުވަހުން އަނެއްދުވަހަށް ބޮޑުވަމުންދާއިރު، ކަސްޓަމަރުންގެ އަސާސީ ބޭނުންތަކަށް ބޭނުންވާ ޑޮލަރު ފޯރުކޮށްދިނުމަށް ބޭންކުން އަބަދުވެސް ހާއްސަ އިސްކަމެއް ދޭނެކަމުގެ ޔަގީންކަން ބޭންކުން ވަނީ ދީފައެވެ.
