ޕީޕަލްސް ނެޝަނަލް ކޮންގްރެސް (ޕީއެންސީ) ގެ އެތެރޭގެ އިންތިހާބުގައި ހުޅުމާލެ އުތުރު ދާއިރާގެ އަންހެނުންގެ ގޮފީގެ ރައީސްކަން ސަމާ ޚަލީލް ކާމިޔާބުކޮށްފިއެވެ.
މި އިންތިހާބުގައި ސަމާ ޚަލީލް ވާދަކޮށްފައިވަނީ ހުޅުމާލެ އުތުރު ދާއިރާ ތަމްސީލުކުރައްވާ މަޖިލިސް މެންބަރު ޙުސެން ޝަރީފްގެ އަނބިކަނބަލުން ޝިނާ ވަޖީހާއެވެ. ވަރަށް ވާދަވެރިކޮށް ކުރިއަށްދިޔަ މި އިންތިހާބުގެ ނަތީޖާ ދައްކާގޮތުން ސަމާ ޚަލީލަށް ލިބިފައިވަނީ 108 ވޯޓެވެ. އޭނާއާ ވާދަކުރި ޝިނާ ވަޖީހަށް ލިބިފައިވަނީ 96 ވޯޓެވެ. މިއާއެކު ސަމާ މި ގޮނޑި ކާމިޔާބުކުރީ 12 ވޯޓުގެ ތަފާތުންނެވެ.
މި ނަތީޖާއާއެކު، މެންބަރު ޙުސެން ޝަރީފަށް ވަނީ ސިޔާސީ ގޮތުން ބޮޑު ނާކާމިޔާބީއަކާ ކުރިމަތިލާން ޖެހިފައެވެ. ސަބަބަކީ އޭނާ އެންޑޯޒްކުރައްވައިގެން ނެރުއްވި ގިނަ ކެންޑިޑޭޓުންނަށް ކާމިޔާބީ ލިބިފައިނުވުމުންނެވެ.
އިންތިހާބުގެ ވޯޓުލުން ކުރިއަށްދިޔަ ވަގުތާއި ވޯޓު ގުނުމުގެ މަރުހަލާގައި ހުޅުމާލެ އުތުރު އަދި ދެކުނު ދާއިރާގެ ވޯޓުލާ މަރުކަޒުތަކުގައި ބައެއް ހަމަނުޖެހުންތަކެއް ހިނގާފައިވާކަން ފާހަގަކުރެވެއެވެ. މަންޒަރު ދުށް ފަރާތްތަކުން މައުލޫމާތު ދޭ ގޮތުގައި، މެންބަރު ޙުސެންގެ ޓީމަށް ނިސްބަތްވާ ބައެއް ފަރާތްތަކުން ވަނީ ވޯޓުލާ މަރުކަޒުތަކުގައި ހަމަނުޖެހުން އުފައްދައި، މާރާމާރީ ހިންގާފައެވެ.
މިއާއެކު މެންބަރު ޙުސެން ޝަރީފަކީ ޕާޓީގެ އެތެރޭގައި ފިތުނަ އުފައްދައި، ބައިބައިވުން އުފެއްދުމަށް މަސައްކަތްކުރާ ފަރާތެއްގެ ގޮތުގައި ވަނީ ޕާޓީގެ އާންމު މެންބަރު މިހާރު އަންނަނީ ސިފަކުރަމުންނެވެ. މި އިންތިހާބުގެ ނަތީޖާއިން ދޭހަވަނީ ޕާޓީގެ އާންމު މެންބަރުން ވަނީ އެފަދަ ކަންކަމާ ދެކޮޅުކަން ހާމަކޮށްފައެވެ.
މި އިންތިހާބަކަށްފަހު ޕީއެންސީގެ އެތެރޭގެ ހާލަތު ހަމައަކަށް އެޅުވި ދާއިރާތަކުގެ ރައްޔިތުންނާއެކު މިހާރަށްވުރެ ބޮޑަށް މަސައްކަތްކުރެވިގެންދާނެ ކަމަށް އިންތިހާބު ކާމިޔަބުކުރި ފަރާތްތަކުން ވަނީ ބުނެފައެވެ.
