ވެރިކަން ކުރާ ޕްރޮގްރެސިވް ކޮންގްރެސް ކޯލިޝަން (ޕީއެންސީ) ގެ އެތެރޭގެ އިންތިޚާބާ ގުޅިގެން ހުޅުމާލޭގައި ބޮޑު ހަމަނުޖެހުމެއް ހިނގައި، ދައުލަތުގެ މުދަލަށް ގެއްލުންދީ މީހުންނަށް އަނިޔާކޮށްފިއެވެ.
ދައުރުވަމުންދާ ވީޑިއޯތަކުން ފެންނަގޮތުގައި މި ހަމަނުޖެހުމުގައި އިސްކޮށް އުޅުނީ ހުޅުމާލެ އުތުރު ދާއިރާގެ މަޖިލިސް މެންބަރު ހުސައިން ޝަރީފްގެ ދަރިފުޅު ސާޖިދު އާއި އޭނާގެ ޓީމުންނެވެ.
ފުލުހުން ބުނި ގޮތުގައި، 2026 ޖުލައި 11 ވަނަ ދުވަހުގެ ރޭ 21:15 އެހައިކަންހާއިރު ހުޅުމާލެ ފޭސް 2 ގައި ހުންނަ ކާމިލްދީދީ ޕްރީ ސްކޫލުގައި ޕީއެންސީގެ އެތެރޭގެ އިންތހާބުގެ ވޯޓު ގުނުން ކުރިއަށް ދަނިކޮށް، ބަޔަކު ވަނީ އެތަނަށް ވަދެގަނެ ސްކޫލުގެ މުދަލަށް ގެއްލުންދީ، އެތަނުގައި ތިބި މީހުންނާ މެދު މާރާމާރީ ހިންގާފައެވެ.
އެންމެ ފުރަތަމަ މި ހަމަނުޖެހުންތައް ފެށުނީ ހުޅުމާލެ ދެކުނު ދާއިރާގެ ވޯޓު ފޮށި ގުނަމުން ދިޔަ ވަގުތުއެވެ. އެ ދާއިރާގެ ނައިބު ރައީސް ހޮވުމަށް ބޭއްވި ވޯޓުގެ ނަތީޖާއިން މެންބަރު ހުސައިންގެ ކެންޑިޑޭޓް ޝަޔާން ބަލިވާން ފެށުމުން، ދެ ފަހަރެއްގެ މަތިން ވޯޓު ގުނުން ހުއްޓުވައި މާރާމާރީ ހިންގަން މަސައްކަތް ކުރި ކަމަށް މައުލޫމާތު ލިބެއެވެ. ޕީއެންސީގެ އިންތިޚާބީ ކޮމިޓީން އަލުން ވޯޓު ގުނުމަށްފަހު، އެ ގޮނޑި ކާމިޔާބު ކުރީ މަރްޔަމް ޝިއުނާ އެވެ. ޝިއުނާ އަށް 89 ވޯޓު ލިބުނުއިރު، ޝަޔާން އަށް ލިބުނީ 84 ވޯޓެވެ. ޝަޔާންގެ ޓީމުން ހަމަނުޖެހުން ހިންގާ ބިރުވެރިކަން އުފެއްދުމާއެކު، ބާތިލް ވޯޓުތަކެއް ހިމަނައިގެން ގުނުމުންވެސް 5 ވޯޓުގެ ފަރަގަކުން އޭނާ ވަނީ ނާކާމިޔާބުވެ ބޮޑު ލަދަކާ ކުރިމަތިލާން ޖެހިފައެވެ.
ދެކުނު ފޮށީގެ ނަތީޖާއަށްފަހު، ހުސައިންގެ ޓީމުން ވަނީ އުތުރު ދާއިރާގެ ވޯޓު ގުނަމުންދިޔަ ކާމިލްދީދީ ސްކޫލަށް ގޮސްފައެވެ. އެތަނުގައި ހަމަނުޖެހުން ހިންގީ މެންބަރު ހުސައިންގެ އަނބިކަނބަލުން ޝިނާ ބަލިވެ، މަލްޝާ އިންތިޚާބު ކާމިޔާބު ކޮށްފާނެ ކަމަށް ލަފާކުރެވުމާ އެކުގައެވެ. މެންބަރު ހުސައިންގެ ދަރިފުޅު ސާޖިދު އާއި ޝަޔާން އިތުރު ބަޔަކާއެކު ސްކޫލަށް ވަދެ، ވޯޓު ފޮށި ފަޅާލަން މަސައްކަތްކޮށް، ސްކޫލުގެ ދޮރުތައް ތަޅާލައި ބޮޑެތި ގެއްލުންތަކެއް ދީފައިވެއެވެ.
މި ހަމަނުޖެހުމުގައި އެތަނުގައި ތިބި ޕީއެންސީގެ އެތައް ޒުވާނުންނަކަށާއި، ޑިއުޓީގައި ހުރި ފުލުހަކަށްވެސް ވަނީ އަނިޔާވެފައެވެ. މީގެ އިތުރުން، މަޖިލިސް މެންބަރު ޝަޒީމް އާއި އިންތިޚާބުގައި ވާދަކުރި ބައެއް ކެންޑިޑޭޓުންނަށްވެސް ވަނީ ޖިސްމާނީ އަނިޔާތައް ދީފައެވެ.
މި ހާދިސާއާ ގުޅިގެން ގިނަ ބަޔަކު ދަނީ ނުރުހުން ފާޅުކުރަމުންނެވެ. ހާއްސަކޮށް، ހަމަނުޖެހުން ހިންގި ސާޖިދު އާއި އޭނާގެ ބައިވެރިން މިހާތަނަށް ހައްޔަރުކޮށްފައި ނުވާތީ، ފުލުހުން މެންބަރުގެ މަސްލަހަތު ހިމާޔަތް ކުރަނީ ކަމަށް ބުނެ ގިނަ ބަޔަކު ދަނީ ސޯޝަލް މީޑިއާގައި ފާޑުކިޔަމުންނެވެ.
މި މައްސަލައާ ގުޅިގެން ޕީއެންސީގެ ރަސްމީ ބަހެއް މިހާތަނަށް ލިބިފައެއް ނުވެއެވެ. ފުލުހުން ބުނީ މި މައްސަލަ އިތުރަށް ތަހުގީގު ކުރަމުންދާ ކަމަށެވެ.
