ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އެތެރޭގެ އިންތިހާބުގައި، އެ ޕާޓީގެ ސޯޝަލް މީޑިއާ އެކްޓިވިސްޓުންގެ ގޮތުގައި ފާހަގަކޮށްލެވޭ މަރްޔަމް ޝިއުނާ އާއި މަލްޝާ ޝަރީފް ބޮޑު ކާމިޔާބީއެއް ހޯދައިފިއެވެ.
މި ދެ ކެންޑިޑޭޓުން ވާދަކޮށްފައިވަނީ ރައްޔިތުންގެ މަޖިލީހުގެ ހުޅުމާލެ އުތުރު ދާއިރާ ތަމްސީލުކުރައްވާ މެންބަރު ޙުސައިން ޝަރީފް އެންޑޯޒްކުރައްވައިގެން ނެރުއްވި ކެންޑިޑޭޓުންނާއެވެ. ނަމަވެސް އޭނާ އެންޑޯޒްކުރައްވައިގެން ނެރުއްވި ގިނަ ކެންޑިޑޭޓުންނަށް މި އިންތިހާބުގައި ކާމިޔާބުވާގޮތް ވަނީ ނުވެފައެވެ.
މި އިންތިހާބުގައި ހުޅުމާލެ ދެކުނު ދާއިރާގެ ނައިބު ރައީސް ކަމަށް ވާދަކުރި މަރްޔަމް ޝިއުނާ ވަނީ 89 ވޯޓު ހޯދާފައެވެ. އޭނާއާ ވާދަކުރި ކެންޑިޑޭޓް ޢަބްދުﷲ ޝާޔާން ޝާހިދަށް ލިބިފައިވަނީ 84 ވޯޓެވެ. ހަމައެހެންމެ، ހުޅުމާލެ އުތުރު ދާއިރާގެ ނައިބު ރައީސް ކަމަށް ވާދަކުރި މަލްޝާ ޝަރީފް ވަނީ 116 ވޯޓާއެކު އިންތިހާބު ކާމިޔާބުކޮށްފައެވެ. މަލްޝާއާ ވާދަކުރި އިރުޝާދު ޒާހިރަށް ލިބިފައިވަނީ 90 ވޯޓެވެ.
މި ނަތީޖާއާއެކު، ހުޅުމާލެ އުތުރު ދާއިރާގެ މަޖިލިސް މެންބަރު ޙުސައިން ޝަރީފަށް ވަނީ ސިޔާސީ ގޮތުން ބޮޑު ނާކާމިޔާބީއަކާ ކުރިމަތިލާން ޖެހިފައެވެ. ސަބަބަކީ އޭނާ އެންޑޯޒްކުރައްވައިގެން ނެރުއްވި ކެންޑިޑޭޓުން މި އިންތިހާބުގައި ބޮޑުތަނުން ބަލިވެފައިވުމެވެ. ވަކިން ހާއްސަކޮށް މެންބަރު ޙުސައިން ޝަރީފްގެ އަނބިކަނބަލުން ޝިނާ ވެސް ވަނީ މި އިންތިހާބުގައި ބޮޑުތަނުން ބަލިވެފައެވެ.
އިންތިހާބުގެ ވޯޓު ގުނުން ކުރިއަށްދިޔަ ވަގުތު ހުޅުމާލެ ދެކުނާއި ހުޅުމާލެ އުތުރު ދާއިރާގެ ވޯޓުލާ މަރުކަޒުތަކުގައި މެންބަރު ޙުސައިންގެ ޓީމުން ހަމަނުޖެހުންތައް ވެސް ހިންގާފައިވާކަން ފާހަގަކޮށްލެވެއެވެ. އެގޮތުން އެ ޓީމުގެ ބަޔަކު ވަނީ އެ ސަރަހައްދުތަކުގައި ހަމަނުޖެހުން އުފައްދައި، މާރާމާރީ ހިންގައި ފުލުހުންނާ ކުރިމަތިލާފައެވެ.
ޖުމްލަ 2،086 މަގާމަށް މީހުން އިންތިހާބުކުރުމަށް ބޭއްވި މި އިންތިހާބަކީ ވަރަށް ފޯރިއާއި ވާދަވެރިކަމާއެކު ކުރިއަށްދިޔަ އިންތިހާބެކެވެ. ރާއްޖޭގެ މީހުން ދިރިއުޅޭ 131 ރަށެއްގައި ކުރިއަށްދިޔަ މި އިންތިހާބުގައި، އިންތިހާބުކުރުމަށް ހަމަޖެހިފައިވާ އަދަދަށްވުރެ އިތުރަށް ކެންޑިޑޭޓުން ވާދަކޮށްފައިވާކަން ޕާޓީން ވަނީ ހާމަކޮށްފައެވެ.
