ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ދާއިރާތަކުގެ އިންތިހާބުގައި 33،000 އެއްހާ މީހުން ވޯޓުލާފައިވާކަމަށް އެ ޕާޓީގެ ޗެއަރޕާސަން އަދި ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވެއްޖެއެވެ.
މި އިންތިހާބާ ގުޅޭގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ޢަބްދުއްރަޙީމް ވިދާޅުވީ، ޕާޓީގެ ދަފްތަރުގައި ހިމެނޭ މެންބަރުންގެ ތެރެއިން ގާތްގަނޑަކަށް 40،000 މީހުންނަށް ވޯޓުލުމުގެ ހައްގު ލިބިފައިވާއިރު، އޭގެ ތެރެއިން 85 އިންސައްތަ މީހުން ވޯޓުލާފައިވާ ކަމަށެވެ.
”ވޯޓު ފޮށި ބަންދުކުރުމާ ހަމައަށް ވޯޓުލުމުގެ ހައްގު ލިބިގެންވާ މީހުންގެ ގާތްގަނޑަކަށް 85 ޕަސެންޓު މިވަނީ ވޯޓުލާފައި. އެއީ ގާތްގަނޑަކަށް 32،000 އާއި 33،000 އާ ދެމެދުގެ އަދަދެއް. ފައިނަލް އަދަދު ސާފުވާނީ ވޯޓުގެ ރަސްމީ ނަތީޖާ ލިބުމުން،“ – ޢަބްދުއްރަޙީމް ވިދާޅުވިއެވެ.
މުޅި ރާއްޖޭގެ 131 ރަށެއްގައި ވޯޓުލުން ކުރިއަށްދިޔަ މި އިންތިހާބުގައި އެކި މަގާމުތަކަށް 2،500 އެއްހާ ކެނޑިޑޭޓުން ވާދަކުރިއެވެ. ޢަބްދުއްރަޙީމް ފާހަގަކުރެއްވި ގޮތުގައި، ޕާޓީގެ އެތެރޭގެ އިންތިހާބެއްގައި މިހާ ގިނަ އަދަދެއްގެ ބަޔަކު ވޯޓުލާން ނުކުތުމަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސިޔާސަތުތަކަށް ރައްޔިތުންގެ އިތުބާރު އޮތް މިންވަރު ހާމަވާ ކަމެކެވެ.
”މިފަދަ އިންތިހާބެއްގައި މިހާ ގިނަ އަދަދެއްގެ ބަޔަކު ވާދަކޮށް، މިހާ ގިނަ ބަޔަކު ވޯޓުލުމަކީ ޕީއެންސީއަށް ރައްޔިތުންގެ މެދުގައި އޮތް ބޮޑު ތާއީދު ފެނިގެންދާ ކަމެއް. ރައީސުލްޖުމްހޫރިއްޔާއަށް އިތުބާރު ނެތް ނަމަ، ޕާޓީގެ އެތެރޭގެ އިންތިހާބެއްގައި 2،000 އަށްވުރެ ގިނަ މީހުން ވާދައެއް ނުކުރާނެ،“ – އޭނާ ވިދާޅުވިއެވެ.
އިންތިހާބުގެ ކަންކަން އެއްވެސް ހަމަނުޖެހުމެއް ނެތި، އަމާންކަމާއެކު ނިންމާލެވުމަކީ ޕީއެންސީއަކީ ސުލްހަވެރިކަމަށް ލޯބިކުރާ މަސްލަހަތު އިސްކުރާ ޕާޓީއެއްކަން ސާބިތުކޮށްދިން ކަމެއްގެ ގޮތުގައި ޢަބްދުއްރަޙީމް ސިފަކުރެއްވިއެވެ. އަދި އިންތިހާބުގެ ކަންކަން ކާމިޔާބުކަމާއެކު ކުރިއަށް ގެންދިއުމުގައި ޕާޓީގެ މެންބަރުންނާއި ކެނޑިޑޭޓުން ދެއްވި އެއްބާރުލުމަށްޓަކައި އޭނާ ވަނީ ޝުކުރު އަދާކުރައްވާފައެވެ.
