ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އެތެރޭގެ އިންތިހާބުގެ ވޯޓުލުމުގެ ވަގުތު މިއަދު ހަވީރު 17:00 އާ ހަމައަށް އިތުރުކޮށްފިއެވެ.
މި އިންތިހާބުގެ ވޯޓުލުން ފަށާފައިވަނީ މިއަދު ހެނދުނު 09:00 ގައެވެ. ޕީއެންސީން މައުލޫމާތު ދޭ ގޮތުގައި، މި އިންތިހާބުގައި ރާއްޖޭގެ މީހުން ދިރިއުޅޭ ގިނަ ރަށްތަކެއް ހިމެނޭހެން ޖުމްލަ 131 ރަށު ދާއިރާއެއްގައި ވޯޓުލުން ކުރިއަށްދާނެއެވެ. ހަމައެހެންމެ، މި އިންތިހާބުގައި ވޯޓުލުމުގެ ހައްގު ލިބިގެންވަނީ މިދިޔަ ޖޫން މަހުގެ 15 ވަނަ ދުވަހުގެ ނިޔަލަށް އިލެކްޝަންސް ކޮމިޝަނުގެ ދަފްތަރުގައި ޕީއެންސީގެ މެންބަރުންގެ ގޮތުގައި ރަޖިސްޓްރީވެފައިވާ ފަރާތްތަކަށެވެ.
މި އިންތިހާބުގައި ދާއިރާތަކުގެ ރައީސުން ހޮވުމަށް ހަމަޖެހިފައިވަނީ ހަމައެކަނި ރައްޔިތުންގެ މަޖިލީހުގައި ޕީއެންސީ ތަމްސީލުކުރައްވާ މެންބަރަކު ނެތް ދާއިރާތަކުގައެވެ. ޕާޓީގެ އުސޫލުތައް ހަމަޖެހިފައިވާ ގޮތުން، މަޖިލިސް މެންބަރުން ތިއްބަވާ ދާއިރާތަކުގެ ރައީސުންގެ މަގާމު އިއްތިފާގުން ލިބިވަޑައިގަންނަވާނީ އެ ދާއިރާއެއް ތަމްސީލުކުރައްވާ މަޖިލިސް މެންބަރަށެވެ.
ދާއިރާތަކުގެ ރައީސުންގެ އިތުރުން، ދާއިރާތަކުގެ ނައިބު ރައީސުންނާއި، އަންހެނުންގެ ގޮފި އަދި ޒުވާނުންގެ ގޮފީގެ މަގާމުތަކަށް މެންބަރުން އިންތިހާބު ކުރުމަށް ވެސް ވަނީ ހަމަޖެހިފައެވެ. ޕީއެންސީން ހާމަކޮށްފައިވާ ގޮތުގައި، މި އިންތިހާބަށްފަހު އެ ޕާޓީގެ އިންތިހާބީ އެކި އެކި މަގާމުތަކުގައި 2,500 އަށްވުރެ ގިނަ މެންބަރުން ހަރަކާތްތެރިވާނެއެވެ.
