އުތުރު ޣައްޒާގައި ހުންނަ ކަމާލް އަދުވާން ހޮސްޕިޓަލުގެ ތެރެއަށް ޔަހޫދީ އިސްތިއުމާރުގެ ޑްރޯނަކުން ބޮންއަޅާ ޙަަމަލާދީ ހަނގުރާމައިގެ ޖަރީމާ ހިންގައިފިއެވެ. މި ޙަމަލާގެ ސަބަބުން ހޮސްޕިޓަލުގެ ދެ މުވައްޒަފަކު ވަރަށް ބޮޑަށް ޒަޚަމްވެފައިވާ ކަމަށް ކުއްލި ފަރުވާދޭ ޓީމުތަކުން ކަށަވަރުކޮށްދެއެވެ.
މި ޙަމަލާ އަމާޒުވީ ހޮސްޕިޓަލުގެ ގޯތިތެރެއަށެވެ. މިއީ ސިއްޙީ ފަރުވާދޭ ތަންތަނާއި، ޢާންމުން ހިމާޔަތް ހޯދާ ތަންތަނަށް ދޭ ޙަމަލާތައް އިތުރުވަމުންދާ ދަނޑިވަޅެއްގައި ހިނގި ކަންބޮޑުވާންޖެހޭ ޙާދިސާއެކެވެ.
ޙަމަލާގެ ސަބަބުން ޒަޚަމްވި ސިއްޙީ މުވައްޒަފުންނަށް ފަރުވާދެމުންދާއިރު، މިކަމާ ގުޅިގެން ބައިނަލްއަޤްވާމީ ފެންވަރުގައި ދަނީ ވަރަށް ބޮޑަށް ފާޑުކިޔުން އަމާޒުވަމުންނެވެ. އެކެމަކު އެއްވެސް ފަރާތަކުން އިޒްރޭލުގެ އަނިޔާވެރިކަނާ ހުއްޓުވުމަށްވެސް ޒިންމާދާރުކުރުވަންވެސް ވަނީ ނުކުޅެދިފައެވެ. މިޔާ ޚިލާފަށް ދުނިޔޭގެ ބޮޑު ބާރު އެމެރިކާ އަދި ހުޅަނގުގެ ބައިވެރިންދަނީ އިޒްރޭލުގެ ނަސްލުހޭދުއަށް ފަންޑުކޮށް، އަސްކަރީގޮތުންނާއި ސިޔާސީ ގޮތުންވެސް އެއްބާރުލުން ދެމުންނެވެ.
ޣައްޒާގެ ސިއްޙީ ނިޒާމު މުޅިން ހަލާކުވެގެން ދިއުމަކީ މި ހަނގުރާމައިގެ ސަބަބުން ކުރިމަތިވި އެންމެ ބޮޑު އެއް ކާރިސާއެވެ. އަދި އިޒްރޭލުން ގަސްދުގައި ހިންގަމުންދާ ނަސްލުހޭދުގެ އަމާޒުތަކުގެ ތެރެއިން އެއް އަމާޒެވެ. ޣައްޒާގެ ހޮސްޕިޓަލްތަކުގެ ޤާބިލުކަމުގެ 94 އިންސައްތަ ވަނީ ހަލާކުވެ ނުވަތަ ބޭނުން ނުކުރެވޭ ވަރަށް ގެއްލުންވެފައެވެ. އަދި އަނިޔާ ލިބުނު 172,000 މީހުންގެ ތެރެއިން 43,000 މީހުންނަކީ ދިގުމުއްދަތުގެ ފަރުވާ ބޭނުންވާ ފަރާތްތަކެވެ. ކަންމިހެން އޮތް އިރުވެސް އަނިޔާވެރި ޔަހޫދީ އިސްތިއުމާރުން ދަނީ ސިއްޙީ މަރުކަޒުތަކުގެ ރައްކާތެރިކަން އެއްކޮށް ގެއްލުވާލާ، ޙަމަލާތައް ދީ، އަސާސީ ފަރުވާ ދިނުމަށްވެސް ބޮޑެތި ހުރަސްތަކެއް ކުރިމަތިވަމުންނެވެ.
7 އޮކްޓޯބަރު 2023 ގައި ޣައްޒާއަށް ޙަމަލާދޭން ފެށި ފަހުން، އިޒްރޭލުން ވަނީ މަދުވެގެން 73،110 ފަލަސްޠީނު ރައްޔިތުން ޝަހީދުކޮށްލާފައެވެ. އަދި މިދިޔަ އޮކްޓޯބަރު މަހު ”ހަމަލާ ހުއްޓާލުމުގެ އެއްބަސްވުން“ ފެށުނު ފަހުން، މަދުވެގެން 1،084 ފަލަސްޠީނު ރައްޔިތުން ވަނީ ޝަހީދުކޮށްލާފައެވެ.
