މޯލްޑިވްސް މަނިޓަރީ އޮޓޯރިޓީ (އެމްއެމްއޭ) އިން ދޫކުރާ މަތީ ތައުލީމުގެ ސްކޮލަރޝިޕްތަކަށް ކުރިމަތިލުމަށް ހުޅުވާލާފައިވާ ފުރުސަތު، މި މަހުގެ 15 ވަނަ ދުވަހުގެ ނިޔަލަށް އެ އޮތޯރިޓީން އިތުރުކޮށްފިއެވެ.
ރާއްޖޭގެ މާލީ ދާއިރާއަށް ބޭނުންވާ ފަންނީ މީހުން ބިނާކުރުމުގެ މަގްސަދުގައި ހުޅުވާލާފައިވާ މި ފުރުސަތުތަކަކީ ބެޗްލާސް ޑިގްރީ، މާސްޓަރސް ޑިގްރީ އަދި ޕީއެޗްޑީ ފެންވަރުގެ ކޯސްތަކަށް އަމާޒުކޮށް އާންމުކޮށް ހުޅުވާލާފައިވާ ފުރުސަތުތަކެކެވެ. މި ސްކޮލަރޝިޕްތަކުގެ ދަށުން ކިޔެވުމުގެ ފުރުސަތު ހަމަޖެހިފައިވަނީ މެލޭޝިޔާގެ މަޝްހޫރު ޔުނިވަރސިޓީތަކުންނެވެ. އޭގެ ތެރޭގައި ހިމެނެނީ:
- ބެޗްލަރސް އޮފް އެކައުންޓިންގ: ސެލަންގޯރ އިސްލާމިކް ޔުނިވަރސިޓީ
- މާސްޓަރސް އޮފް ލޯސް އަދި އިކޮނޮމިކްސް: އިންޓަރނޭޝަލް އިސްލާމިކް ޔުނިވަރސިޓީ
- ޕީއެޗްޑީ (އިސްލާމިކް ފައިނޭންސް އަދި އެޕްލައިޑް މުއާމަލާތު ދާއިރާއިން): އިންސިފް ޔުނިވަރސިޓީ
އެމްއެމްއޭއިން ހާމަކޮށްފައިވާ ގޮތުގައި، މި ސްކޮލަރޝިޕްތަކަށް ހޮވޭ ފަރާތްތަކުގެ ކިޔެވުމުގެ ހުރިހާ ހަރަދެއް އެ އޮތޯރިޓީން ހަމަޖައްސައިދޭނެއެވެ. މީގެ ތެރޭގައި ޓިއުޝަން ފީއާއި ޔުނިވަރސިޓީގެ އެހެނިހެން ފީތަކުގެ އިތުރުން، ދިރިއުޅުމުގެ ހަރަދާއި، ބުކް އެލަވަންސް، އެސްޓެބްލިޝްމަންޓް އެލަވަންސް އަދި ޑިޕާޗަރ އެލަވަންސް ހިމެނެއެވެ. އަދި ވިސާގެ ހަރަދާއި ހެލްތު އިންޝުއަރެންސްވެސް މި ސްކޮލަރޝިޕްގެ ދަށުން ފޯރުކޮށްދޭނެއެވެ.
އެމްއެމްއޭއިން ވަނީ ޝަރުތު ހަމަވާ، ފަރާތްތަކުން ކަނޑައެޅިފައިވާ މުއްދަތުގެ ކުރިން ސްކޮލަރޝިޕަށް ކުރިމަތިލުމަށް އެދިފައެވެ.
