ކުރިއަށް އޮތް ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އެތެރޭގެ އިންތިހާބާ ދިމާކޮށް، ހުޅުމާލެ ދެކުނު ދާއިރާއާއި އުތުރު ދާއިރާ ގުޅިގެން މިރޭ ބޭއްވި ފޯރިގަދަ ކެމްޕޭނު ހަރަކާތް ވަރަށް ކާމިޔާބުކަމާއެކު ނިންމާލައިފިއެވެ.
ހުޅުމާލޭ ޗެނަލް ޕާކުގައި ކުރިއަށް ގެންދިޔަ މި ހަރަކާތަކީ އިންތިހާބަށް ތައްޔާރުވުމުގެ ގޮތުންނާއި، ޕާޓީގެ މެންބަރުންގެ މެދުގައި އޮތް ގުޅުން މިހާރަށްވުރެ އިތުރަށް ބަދަހިކުރުމަށް ކުރިއަށް ގެންދިޔަ މުހިންމު ހަރަކާތެކެވެ. މި ހަރަކާތުގައި ޕާޓީގެ ގިނަ އަދަދެއްގެ އާންމު މެންބަރުންނާއި ސަޕޯޓަރުން ބައިވެރިވެ، ބޮޑު ތަރުހީބެއް ވަނީ ދީފައެވެ.
މި ކެމްޕޭނު ހަރަކާތަކީ ޕީއެންސީ، ސޯޝަލް މީޑިއާގައި ނުފޫޒުގަދަ ދެ އެކްޓިވިސްޓުން ކަމަށްވާ މަރްޔަމް ޝިއުނާ (ނަންނަ) އާއި މަލްޝާ ޝަރީފް (މަލް) ގެ ކެމްޕޭނު ޓީމުތަކުން އިސްނަގައިގެން ބޭއްވި ޙަރަކާތެކެވެ. ނަންނަ އާއި މަލް ވާދަކުރަނީ ހުޅުމާލޭގެ ދެ ދާއިރާއެއްގެ ނައިބު ރައީސްކަމުގެ މަގާމަށެވެ.
އެގޮތުން ނަންނަ ވާދަކުރުމަށް ނިންމާފައިވަނީ ހުޅުމާލެ ދެކުނު ދާއިރާގެ ނައިބު ރައީސްކަމުގެ މަގާމަށެވެ. އަދި މަލް ވާދަކުރުމަށް ނިންމާފައިވަނީ ހުޅުމާލެ އުތުރު ދާއިރާގެ ނައިބު ރައީސްކަމުގެ މަގާމަށެވެ. މި ދެ ކެންޑިޑޭޓުންނަކީ ވެސް ސަރުކާރުގެ ސިޔާސަތުތައް ކުރިއެރުވުމުގައާއި، ޕާޓީގެ އަސާސްތައް ދަމަހައްޓައި ޕާޓީގެ ރޫހު ކުރިއެރުވުމުގައި ނަމޫނާ ދައްކަމުންދާ ދެ ކެންޑިޑޭޓުންކަން ފާހަގަކޮށްލަންޖެހެއެވެ.
މި ކާމިޔާބު ހަރަކާތަށްފަހު، ކެމްޕޭނުގެ ހަރަކާތްތައް ރަސްމީކޮށް ނިންމާލުމުގެ ގޮތުން މާދަމާ ހަވީރު ހާއްސަ ސައިކަލު ބުރެއް ބޭއްވުމަށް ވަނީ ނިންމާފައެވެ. މި ސައިކަލު ބުރުގައި ޕީއެންސީގެ އެންމެހާ މެންބަރުންނާއި ސަޕޯޓަރުން އަދި ވަކިން ހާއްސަކޮށް ހުޅުމާލޭގެ ހުރިހާ ރައްޔިތުން ބައިވެރިވުމަކީ ނަންނަ އާއި މަލްގެ ވަރަށް ބޮޑު އެދުމެކެވެ.
ކެމްޕޭނުގެ ހަރަކާތްތައް ނިންމާލުމަށްފަހު، ދެން އޮތީ އިންތިހާބުގެ އެންމެ މުހިންމު މަރުހަލާ ކަމަށްވާ ވޯޓުލުމުގެ ކަންކަމެވެ. އެގޮތުން މި މަހުގެ 11 ވާ ހޮނިހިރު ދުވަހުގެ ހެނދުނު 09:00 އިން ފެށިގެން ހަވީރު 16:00 އާ ހަމައަށް ވޯޓުލުން ކުރިއަށްދާއިރު، ހުޅުމާލެ ދެކުނު ދާއިރާގެ ވޯޓުފޮށި ބެހެއްޓުމަށް ހަމަޖެހިފައިވަނީ ރެހެންދި ސްކޫލުގައެވެ. އަދި ހުޅުމާލެ އުތުރު ދާއިރާގެ ވޯޓުފޮށި ބެހެއްޓުމަށް ހަމަޖެހިފައިވަނީ ކާމިލްދީދީ ޕްރީ ސްކޫލުގައެވެ.
