ޕީޕަލްސް ނެޝަނަލް ކޮންގްރެސް (ޕީއެންސީ) ގެ އެތެރޭގެ އިންތިހާބުގެ ފޯރި މުޅި ރާއްޖޭގައި ގަދަވެފައިވާއިރު، ހުޅުމާލޭގެ ދެ ދާއިރާއަކަށް ވާދަކުރައްވާ ދެ ކެންޑިޑޭޓުން ކަމަށްވާ މަރްޔަމް ޝިއުނާ (ނަންނަ) އާއި މަލްޝާ ޝަރީފް (މަލް) ގެ ކެމްޕޭނު ނިންމުމުގެ ބޮޑު ހަރަކާތް މާދަމާ ބޭއްވުމަށް ނިންމައިފިއެވެ.
ޝިއުނާ އާއި މަލްޝާ ބައިވެރިވާ މި ފޯރިގަދަ ސައިކަލު ބުރު އޮންނާނީ މާދަމާ ހަވީރު 16:00 އިން ފެށިގެން 18:00 އަށެވެ. މި ހަރަކާތް ފެށުމަށް ހަމަޖެހިފައިވަނީ ހުޅުމާލެ ފިތުރޯނު މަގުގައި ހުންނަ އެމްޓީސީސީ ފެރީ ޓާމިނަލްގެ ޕާކު ކުރިމަތިންނެވެ.
ޕީއެންސީގެ އެތެރޭގެ އިންތިހާބުގައި މަރްޔަމް ޝިއުނާ ވާދަކުރުމަށް ނިންމާފައިވަނީ ހުޅުމާލެ ދެކުނު ދާއިރާގެ ނައިބު ރައީސްކަމުގެ މަގާމަށެވެ. އަދި މަލްޝާ ޝަރީފް ވާދަކުރުމަށް ނިންމާފައިވަނީ ހުޅުމާލެ އުތުރު ދާއިރާގެ ނައިބު ރައީސްކަމުގެ މަގާމަށެވެ. މި ދެ ކެންޑިޑޭޓުންނަކީ ވެސް ސަރުކާރުގެ ސިޔާސަތުތައް ކުރިއެރުވުމުގައާއި، ޕާޓީގެ އަސާސްތައް ދަމަހައްޓައި ޕާޓީގެ ރޫހު ކުރިއެރުވުމުގައި ނަމޫނާ ދައްކަމުންދާ ދެ ކެންޑިޑޭޓުންކަން ފާހަގަކޮށްލަންޖެހެއެވެ.
މާދަމާ ބާއްވާ މި ސައިކަލު ބުރުގައި ޕީއެންސީގެ އެންމެހައި މެންބަރުންނާއި ސަޕޯޓަރުން އަދި ވަކިން ހާއްސަކޮށް ހުޅުމާލޭގެ ހުރިހާ ޕީއެންސީ އާންމު މެންބަރުން ބައިވެރިވުމަކީ ޝިއުނާ އާއި މަލްޝާގެ ވަރަށް ބޮޑު އެދުމެކެވެ.
ކެމްޕޭނުގެ ހަރަކާތްތައް ނިންމާލުމަށްފަހު، ދެން އޮތީ އިންތިހާބުގެ އެންމެ މުހިންމު މަރުހަލާ ކަމަށްވާ ވޯޓުލުމުގެ ކަންކަމެވެ. އެގޮތުން މި މަހުގެ 11 ވާ ހޮނިހިރު ދުވަހުގެ ހެނދުނު 09:00 އިން ފެށިގެން ހަވީރު 16:00 އާ ހަމައަށް ވޯޓުލުން ކުރިއަށްދާއިރު، ހުޅުމާލެ ދެކުނު ދާއިރާގެ ވޯޓުފޮށި ބެހެއްޓުމަށް ހަމަޖެހިފައިވަނީ ރެހެންދި ސްކޫލުގައެވެ. އަދި ހުޅުމާލެ އުތުރު ދާއިރާގެ ވޯޓުފޮށި ބެހެއްޓުމަށް ހަމަޖެހިފައިވަނީ ޞަލާޙުއްދީން ސްކޫލުގައެވެ. ޝިއުނާ އާއި މަލްޝާ ވަނީ ދާއިރާގެ ހުރިހާ ރައްޔިތުން ވެސް އިންތިހާބުގައި ވޯޓުލުމަށް އެދިފައެވެ.
