ހުޅުމާލެ ތިންވަނަ ފިޔަވަހީގެ ބިން ހިއްކުމުގެ މަސައްކަތް ހަލުއިކުރުމަށް އިތުރު ޑްރެޖަރެއް ގެނެސް ބިން ހިއްކުމުގެ މަސައްކަތް ފަށައިފިއެވެ.
މީގެ ކުރިން ތިންވަނަ ފިޔަވަހީގެ ބިން ހިއްކުމުގެ މަސައްކަތް ކުރަމުން ދިޔައީ އެއް ޑްރެޖަރު ބޭނުންކޮށްގެންނެވެ. އެއީ ”ޓީއެސްއެޗްޑީ ވިލެމް ވެން އޮރަންހީ“ އެވެ. މި ޑްރެޖަރުގެ ކެޕޭސިޓީއަކީ 12،000 ކޮޑިމީޓަރެވެ.
ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން ބުނީ ބިން ހިއްކުމުގެ މަސައްކަތަށް ބުރާސްފަތި ދުވަހު ގެނައި ދެވަނަ ޑްރެޖަރު ”ޓީއެސްއެޗްޑީ ޕްރިންސް ޑި ނެޑަރލެންޑެން“ ގައި 22،000 ކޮޑިމީޓަރުގެ ވެލި އުފުލޭނެ ކަމަށެވެ.
ހުޅުމާލޭގެ ތިންވަނަ ފިޔަވަހީގެ ބިން ހިއްކުމުގެ މަސައްކަތުގައި މި ދެ ޑްރެޖަރު އެކުގައި ބޭނުންކުރަން ފެށުމުން މަސައްކަތް އިތުރަށް ހަލުއިވެގެންދާނެ ކަމަށް އެ ކޯޕަރޭޝަނުން ބުނެއެވެ.
ހުޅުމާލޭގެ ތިންވަނަ ފިޔަވަހީގެ ބިން ހިއްކުމުގެ މަޝްރޫއަކީ މާލެ ސަރަހައްދުގައި ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދުމަށް ކުރިއަށް ގެންދާ މަޝްރޫއެކެވެ.
އެޗްޑީސީން ބުނެފައި ވަނީ އެ ކޯޕަރޭޝަނުން މަސައްކަތް ކުރަމުން ދަނީ ބިން ހިއްކުމުގެ މަސައްކަތް ވީހާވެސް އަވަހަކަށް ނިންމައި، ބޯހިޔާވަހިކަމުގެ މައްސަލައަށް އަވަސް ހައްލެއް ހޯދައިދިނުމަށް ކަމަށެވެ.
