ރާއްޖޭގައި ހިމަބިހި ފެތުރުން ކޮންޓްރޯލްކުރުމަށްޓަކައި ޔުނިސެފްގެ ފަރާތުން 28،000 މީސަލްސް ރުބެއްލާ (އެމްއާރް) ވެކްސިން ޑޯޒާއި ސިއްހީ ސާމާނު ރާއްޖެއަށް ހަދިޔާކޮށްފިއެވެ.
މި ތަކެތި ސަރުކާރާ ހަވާލުކުރުމަށް ހެލްތް މިނިސްޓްރީގައި ބޭއްވި ރަސްމިއްޔާތެއްގައި، ދިވެހި ސަރުކާރުގެ ފަރާތުން އެއްބަސްވުމުގައި ސޮއިކުރެއްވީ ހެލްތް މިނިސްޓަރު ޤީލާ ޢަލީއެވެ. ޔުނިސެފްގެ ފަރާތުން ސޮއިކުރެއްވީ އެ ޖަމިއްޔާއިން ރާއްޖެއަށް ކަނޑައަޅުއްވާފައި ހުންނަވާ މަންދޫބު ޑރ. އެޑްވާޑް އަޑާއީއެވެ.
މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ޤީލާ ވަނީ، ހިމަބިހި ފެތުރުން ހުއްޓުވުމަށް ޔުނިސެފުން ވެދިން މި އެހީތެރިކަމަށް ޝުކުރު އަދާކުރައްވާފައެވެ. އަދި ބަލީގެ ނުރައްކަލުން މުޖުތަމައު ސަލާމަތްކުރުމަށްޓަކައި އެންމެހާ ފަރާތްތަކުން ވެކްސިން ފުރިހަމަކުރުމަށް އެކަމަނާ އިލްތިމާސްކުރެއްވިއެވެ. ހަމައެހެންމެ މިކަމުގައި ސިއްހީ ދާއިރާގެ މުވައްޒަފުން ކުރައްވަމުންގެންދަވާ މަސައްކަތްތައް ފާހަގަކުރައްވައި އެ ފަރާތްތަކަށްވެސް އެކަމަނާ ޝުކުރު އަދާކުރެއްވިއެވެ.
އެޗްޕީއޭގެ ތަފާސްހިސާބުތަކަށް ބަލާއިރު، މިދިޔަ މެއި މަހުން ފެށިގެން މިހާތަނަށް 121 މީހަކަށް ހިމަބިހި ޖެހިގެން ރިޕޯޓުކޮށްފައިވެއެވެ. މީގެ ތެރެއިން 55 ކޭސް ފެނިފައިވަނީ މިދިޔަ ހަފުތާގައެވެ. ބަލި ކޮންޓްރޯލްކުރުމުގެ ގޮތުން މިހާތަނަށް 5،495 މީހަކަށް ވެކްސިން ދީފައިވާއިރު، ބަލިޖެހޭ މީހުން ދެނެގަތުމުގެ މަސައްކަތްތައް ވަނީ އިތުރަށް ވަރުގަދަކޮށްފައެވެ.
ޔުނިސެފްގެ އިތުރުން އިންޑިއާ ސަރުކާރުންވެސް ވަނީ ދާދިފަހުން 20،000 ވެކްސިން ޑޯޒާއި ތިން ޓަނުގެ ސިއްހީ އާލާތްތައް ރާއްޖެއަށް ހަދިޔާކޮށްފައެވެ.
