ހުޅުމާލޭގެ ފުރަތަމަ ފިޔަވަހި އަދި ދެވަނަ ފިޔަވަހީގައި މީހުން ދިރިއުޅޭ ސަރަޙައްދުތަކުގެ ތެރެއިން ނުހެދި ހުރި މަގުތައް ތަރައްގީކުރުމަށް ސަރުކާރުން ކުރިއަށްގެންދާ މަޝްރޫއުގެ ދަށުން، މިހާތަނަށް ތިން މަގެއްގައި ތާރު އަޅާ އެއްކޮށް ނިންމާލާފައިވާ ކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހާމަކޮށްފިއެވެ.
ހުޅުމާލޭގެ ދަތުރުފަތުރުގެ ނިޒާމު ހަރުދަނާކޮށް އާންމު ދިރިއުޅުމަށް ލުއިފަސޭހަކަން ގެނައުމަށްޓަކައި މިދިޔަ އަހަރުގެ ޑިސެންބަރު މަހުގެ ތެރޭގައި ފެށި މި މަޝްރޫއަކީ ޗައިނާގެ ރޮޓިމް އިންޖިނިއަރިންގ އެންޑް ޓެކްނޮލޮޖީ ކުންފުންޏާ ހަވާލުކޮށްގެން ކުރިއަށްގެންދާ މަޝްރޫއެކެވެ. އެޗްޑީސީން ހާމަކޮށްފައިވާ ގޮތުގައި، މި މަޝްރޫއުގެ ދަށުން މިހާތަނަށް ތާރު އަޅާ މުޅިން ނިންމާލާފައިވާ ތިން ސަރަހައްދަކީ:
- އެޕޯލޯ ފްލެޓްތަކުގެ ފަހަތުން އޮންނަ މަގު.
- ވަން ސެންޓްރަލް ޕާކް ރެސިޑެންސްއާ އިންވެގެން އޮންނަ މަގު.
- ރޭތިގަލް ރެސިޑެންސްއާ އިންވެގެން އޮންނަ މަގު.
މީގެ އިތުރުން، މިހާރު އެންމެ ހަލުވިކަމާއެކު މަސައްކަތް ކުރިއަށްދަނީ ހުޅުމާލެ ދެވަނަ ފިޔަވަހީގެ ވިނަރެސް ފްލެޓްތަކުގެ ފަހަތުން، ކުރީގެ ފަރުކޮޅުފުއްޓާ ދިމާލަށް އޮންނަ މަގުގައެވެ. އެ ސަރަހައްދުގެ މަގުގެ ސަބްބޭސްގެ މަސައްކަތްތައް ފުރިހަމަކޮށް، މިހާރު ދަނީ އެ މަގުގައި ތާރު އެޅުމުގެ މަސައްކަތް ކުރަމުންނެވެ.
މި މަޝްރޫއުގެ ދަށުން މަގުތަކުގައި ފެންބޮޑުވުމުގެ މައްސަލައަށް ދާއިމީ ހައްލެއް ހޯދުމަށް ޒަމާނީ ފެން ހިންދާ ނިޒާމު ގާއިމުކުރުމާއި، މަގުބައްތި ހަރުކުރުމުގެ މަސައްކަތް ކުރުމަށްވެސް ވަނީ ހަމަޖެހިފައެވެ. މުޅި މަޝްރޫއުގެ 46 އިންސައްތަ މަސައްކަތް މިހާރު ނިމިފައިވާއިރު، ހުޅުމާލޭގެ ހަލާކުވެފައިވާ މަގުތައް މަރާމާތުކުރުމަށް ފަށާފައިވާ ”ޕެޗްވޯކް“ މަސައްކަތުގެ 30 އިންސައްތަ ވެސް މިހާރު ވަނީ ނިންމާލެވިފައެވެ.
އެޗްޑީސީން ބުނީ މި މަޝްރޫއު އެއްކޮށް ނިމުމުން، ހުޅުމާލޭ ފުރަތަމަ ފިޔަވަހީގައި މިހާތަނަށް ނުހެދި ހުރި ހުރިހާ މަގުތަކެއް ތަރައްގީކުރެވި، ވިނަރެސް ސަރަޙައްދުގެ މަގުތަކާއެކު އާންމުން ދިރިއުޅޭ ހުރިހާ ސަރަޙައްދެއްގެ ދަތުރުފަތުރަށް ބޮޑެތި ފަސޭހަތަކެއް ލިބިގެންދާނެ ކަމަށެވެ.
