ބަހުރެއިންގެ މަޝްހޫރު ގަލްފް ހޮޓެލްސް ގްރޫޕުން ރާއްޖޭގެ ކެއިރެޓްސޫ ޕްރައިވެޓް ލިމިޓެޑާ ގުޅިގެން ރާއްޖޭގައި އާ ލަގްޒަރީ ރިސޯޓެއް ތަރައްގީކުރުމަށް ރަސްމީކޮށް އެއްބަސްވެއްޖެ އެވެ.
މި މަޝްރޫއާ ގުޅޭ ގޮތުން ދެ ކުންފުނީގެ ދެމެދުގައި އިއްޔެ ވަނީ އެމްއޯޔޫއެއްގައި ސޮއިކޮށްފަ އެވެ. މި އެއްބަސްވުމުގެ ދަށުން އެ ރިސޯޓު ތަރައްގީކޮށް ހިންގުމަށްޓަކައި ޖޮއިންޓް ވެންޗާ ކުންފުންޏެއް އުފެއްދުމަށް ދެ ފަރާތުން ވަނީ ނިންމާފަ އެވެ. މި މަޝްރޫއުގައި އިކުއިޓީ އިންވެސްޓަރެއްގެ ގޮތުންނާއި ރިސޯޓުގެ އޮޕަރޭޓަރުގެ ހައިސިއްޔަތުން ގަލްފް ހޮޓެލްސް ގްރޫޕުން ހަރަކާތްތެރިވާނެ އެވެ.
މި ރިސޯޓު ތަރައްގީކުރަން ހަމަޖެހިފައިވަނީ ކ. އަތޮޅުގައި، ވެލާނާ އިންޓަނޭޝަނަލް އެއާޕޯޓުން 15 އާއި 25 މިނެޓާ ދެމެދުގެ ދުރުމިނެއްގައި އޮންނަ ފަޅެއްގަ އެވެ. މިއީ ސިންގަލް އައިލެންޑް ކޮންސެޕްޓަށް ތަރައްގީކުރާ ލަގްޒަރީ ރިސޯޓެކެވެ. ރިސޯޓުގެ ވިލާތަކުގެ ގޮތުގައި ބީޗްފްރަންޓް އަދި އޯވަ ވޯޓާ ވިލާތައް ހިމެނޭއިރު، ކޮންމެ ވިލާއެއްގައި ވެސް އަމިއްލަ ޕްރައިވެޓް ޕޫލެއް ހުންނާނެ އެވެ. މީގެ އިތުރުން ވެލްނަސް ފެސިލިޓީތަކާއި ހާއްސަ ހަފްލާތައް ބޭއްވޭނެ ވަސީލަތްތައް ވެސް މި ރިސޯޓުގައި ގާއިމުކުރާނެ އެވެ.
ގަލްފް ހޮޓެލްސް ގްރޫޕުގެ ސީއީއޯ އަހްމަދު ޖަނާހީ ވިދާޅުވީ، މިއީ އެ ކުންފުނިން ރާއްޖޭގައި ތަރައްގީކުރާ ފުރަތަމަ ރިސޯޓަށް ވުމާ އެކު، މިއީ ވަރަށް މުހިންމު މަޝްރޫއެއް ކަމަށެވެ. ކެއިރެޓްސޫ ޕްރައިވެޓް ލިމިޓެޑްގެ މެނޭޖިން ޑިރެކްޓަރު ސޮފްވާން އަހްމަދު ވިދާޅުވީ، ދެ ކުންފުނީގެ ތަޖުރިބާ އެއްކޮށްލައިގެން ބައިނަލްއަގްވާމީ ފެންވަރުގެ ލަގްޒަރީ ރިސޯޓެއް ތަރައްގީ ކުރެވޭނެ ކަމުގެ ފުރިހަމަ ޔަގީންކަން އެބައޮތް ކަމަށެވެ.
ގަލްފް ހޮޓެލްސް ގްރޫޕަކީ ހޮސްޕިޓާލިޓީ ދާއިރާގައި 50 އަހަރަށް ވުރެ ދިގު މުއްދަތެއްގެ ތަޖުރިބާ ލިބިފައިވާ ކުންފުންޏެކެވެ. އެ ކުންފުނީގެ ވިޔަފާރީގެ ވިއުގަ ބަހުރެއިންގެ އިތުރުން ޔޫއޭއީ އާއި އެފްރިކާގެ އެކި ގައުމުތަކުގައި ފުޅާކޮށް ހިންގަމުން އަންނަ އިރު، އޭގެ ތެރޭގައި ހޮޓާތަކާއި ރިސޯޓުތަކުގެ އިތުރުން ކޮންވެންޝަން ފެސިލިޓީތައް ވެސް ހިމެނެ އެވެ.
