2026 ވަނަ އަހަރުގެ ފީފާ ވޯލްޑް ކަޕްގެ ގަދަ 16 ގެ މެޗުތަކާ ދިމާކޮށް، ފީފާގެ އެތެރޭގައި ހިންގާފައިވާ ބޮޑެތި އޮޅުވާލުންތަކާއި ސިޔާސީ ނުފޫޒުގެ މައްސަލަތައް ފަޅާއަރައި، މުޅި ދުނިޔޭގައި ބޮޑު ހޫނުގަނޑެއް އުފެދިއްޖެއެވެ.
މެޗުގެ ނަތީޖާ ގަސްތުގައި ބަދަލުކުރިކަމުގެ ތުހުމަތު މިޞްރުގެ ކޯޗު ފީފާއަށް ކުރިއިރު، އެމެރިކާގެ ރައީސްގެ ބިރުދެއްކުމަށް ފީފާއިން ދީލާލި މައްސަލާގައި ޔޫރަޕްގެ ފުޓުބޯޅަ އިދާރާ (ޔޫއެފްއޭ) އިން ވަނީ ނުރުހުން ފާޅުކޮށްފައެވެ.
ފީފާގެ ކޮރަޕްޝަނާއި ބޮޑެތި ތުހުމަތުތައް
– މެސީ ބަހައްޓަން މެޗު އޮޅުވާލުން: ވޯލްޑް ކަޕްގެ ގަދަ 16 ގައި އާޖެންޓީނާ އަތުން 3-2 އިން ބަލިވެ މިޞްރު ކަޓަން ޖެހުނީ ރެފްރީން ގަސްތުގައި ނިންމި ބޭއިންސާފު ނިންމުންތަކެއްގެ ސަބަބުން ކަމަށް މިޞްރުގެ ކޯޗު ހުސާމް ޙަސަން ވަނީ ތުހުމަތުކޮށްފައެވެ. މިޞްރުން 2-0 ގެ ލީޑެއް ނަގާފައިވަނިކޮށް، ފަހު 11 މިނެޓުގެ ތެރޭގައި އާޖެންޓީނާއިން 3 ގޯލު ޖެހިއިރު، ވީއޭއާރް މެދުވެރިކޮށް މިޞްރުގެ ގޯލެއް ކެންސަލްކޮށް، މެސީއާއި އާޖެންޓީނާ މުބާރާތުގައި ބެހެއްޓުމަށް ފީފާއިން މަސައްކަތް ކުރިކަމަށް އޭނާ ބުންޏެވެ.
– ޓްރަމްޕްގެ ނުފޫޒާއި އެމެރިކާ ކެޓުން: އެމެރިކާގެ ކުޅުންތެރިޔާ ފޮލަރިން ބަލޯގުންއަށް ދެއްކި ރަތް ކާޑުގެ ސަސްޕެންޝަން، ރައީސް ޑޮނަލްޑް ޓްރަމްޕް ފީފާގެ ރައީސް ޖިއާނީ އިންފަންޓީނޯއަށް ގުޅުއްވައި ނުފޫޒު ފޯރުވައިގެން އުވާލި މައްސަލައިގައި ޔޫއެފްއޭއިން ވަނީ ކަންބޮޑުވުން ފާޅުކޮށްފައެވެ. ނަމަވެސް، މި ބޮޑު އޮޅުވާލުމާއެކުވެސް، ބެލްޖިއަމް އިން ވަނީ 4-1 ގެ ތަފާތު ބޮޑު ނަތީޖާއަކުން އެމެރިކާ ބަލިކޮށް، އެމީހުންގެ އަމިއްލަ ޤައުމުގައި މުބާރާތުން ކަޓުވާލާފައެވެ.
– ރަޝިޔާއާއި އިޒްރޭލުގެ ތަފާތުކުރުން: ޔޫކްރެއިންއަށް އެރުމާއެކު އެންމެ މަދު ދުވަސްކޮޅެއްގެ ތެރޭގައި ފީފާއިން ރަޝިޔާ ސަސްޕެންޑްކުރިއިރު، ޣައްޒާގައި އިޒްރޭލުން ހިންގަމުންދާ ރަހުމްކުޑަ ޤަތުލުޢާންމާއި ނަސްލުހޭދުއާ ގުޅިގެން އދ. އާއި ބައިނަލްއަޤްވާމީ ކޯޓުތަކުން އިޒްރޭލު ކުށްވެރިކުރާއިރުވެސް، އެ ޤައުމާ ދެކޮޅަށް އެއްވެސް ފިޔަވަޅެއް އެޅުމަށް ފީފާއިން ދަނީ ދެކޮޅު ހަދަމުންނެވެ.
– ފަލަސްޠީނާއި އެލް.ޖީ.ބީ.ޓީ: އެލީޓުންގެ ލޮބިކުރުމާއި، ސިޔާސީ އަދި މާއްދީ ފައިދާއަށް ފީފާއިން އެމީހުންގެ މުބާރާތްތަކުގައި އެލް.ޖީ.ބީ.ޓީ ”ޙައްޤުތައް“ ޕްރޮމޯޓްކުރަން ކުޅުންތެރިންނަށް މަޖުބޫރުކުރާއިރު، ފަލަސްޠީނުގެ ދިދަ ނެގުމާއި ފަލަސްޠީނުގެ މުސްލިމުންނަށް ތާއީދުކޮށް ޝުޢޫރު ފާޅުކުރުން ވަނީ ”ސިޔާސީ“ ކަމެއްގެ ގޮތުގައި ބަލައި، އެފަދަ ޢަމަލުތައް ހިންގާ ފަރާތްތަކަށް އަދަބުދީ މަނާކޮށްފައެވެ.
