ދިވެހިރާއްޖޭގެ ސަގާފީ ތަރިކައިގެ ދާއިރާ ކުރިއެރުވުމަށްޓަކައި، އެ ދާއިރާގެ ފަންނުވެރިންގެ ހިޔާލާއި މަޝްވަރާ ހޯދައިގެން ސިޔާސަތުތައް ބައްޓަންކުރުމަކީ ސަރުކާރުގެ މުހިންމު އަމާޒެއް ކަމަށް ހެރިޓޭޖް މިނިސްޓަރު ހީނާ ވަލީދު ވިދާޅުވެއްޖެއެވެ.
މިނިސްޓަރު ހީނާ މިމޭރުމުން ވިދާޅުވީ، ”ތަރިކަވެރިންގެ އަޑު“ ގެ ނަމުގައި ރާއްޖޭގެ ސަގާފީ ތަރިކައިގެ ދާއިރާގެ ފަންނުވެރިންނާ ބައްދަލުކުރެއްވުމަށްފަހު މީޑިއާއަށް ރޭ ދެއްވި އިންޓަރވިއުއެއްގައެވެ. މިއީ މި ދާއިރާގައި މަސައްކަތްކުރާ ފަންނުވެރިންނާ ބައްދަލުކޮށް މަޝްވަރާކުރުމަށް ބޭއްވުނު މިފަދަ ފުރަތަމަ ބައްދަލުވުންކަން މިނިސްޓަރު ފާހަގަކުރެއްވިއެވެ.
މި ބައްދަލުވުމުގައި ދިވެހި ބޭސްވެރިކަމާއި، ކުރެހުމުގެ ފަންނާއި، އަދި ތަރިކައާ ގުޅުންހުރި ކުދި ވިޔަފާރިތަކުގައި ހަރަކާތްތެރިވާ އެކި ދާއިރާތަކުގެ ފަންނުވެރިން ބައިވެރިވެވަޑައިގެންފައިވެއެވެ.
ފަންނުވެރިންނާ ބައްދަލުކޮށް، އެ ބޭފުޅުންގެ ފަންނުތަކާ ގުޅޭގޮތުން ވާހަކަދައްކާލުމުގެ ފުރުސަތު ލިބިގެންދިއުމަކީ މި ދާއިރާ ހަރުދަނާކުރުމަށް އެޅުނު މުހިންމު ފިޔަވަޅެއްގެ ގޮތުގައި ސިފަކުރައްވަމުން މިނިސްޓަރު ވިދާޅުވީ، އެ ބޭފުޅުންގެ ހިޔާލުތަކަށް ބިނާކޮށް، ގުޅިގެން ކުރެވިދާނެ ގިނަ މަސައްކަތްތަކެއް މިހާރު ދެނެގަނެވިފައިވާ ކަމަށާއި، ސަރުކާރުގެ ސިޔާސަތަކީ ފަންނުވެރިންގެ ފަންނީ ލަފަޔާއި އިރުޝާދުގެ ދަށުން ދާއިރާގެ ކުރިމަގު ބައްޓަންކުރުން ކަމަށެވެ.
