ރާއްޖޭގެ މަސްވެރިކަން ކުރިއަށްވުރެ ރަނގަޅުވެ، ދުވާލެއްގެ މައްޗަށް އެވްރެޖްކޮށް 50 ޓަނުގެ މަސް ކިރުވަމުންދާ ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ހާމަކޮށްފިއެވެ.
މިފްކޯއިން މިކަން ހާމަކޮށްފައިވާއިރު، ވޭތުވެދިޔަ ދުވަސްތަކުގައި ރާއްޖޭގެ މަސްވެރިކަން އޮތީ ވަރަށް ބޮޑަށް ދަށްވެފައެވެ. މިކަން އެންމެ ބޮޑަށް ހާމަވަނީ މިދިޔަ ޖޫން މަހުގެ ތެރޭގައި މަސްވެރިންނަށް ދޫކޮށްފައިވާ ފައިސާގެ އަދަދުތަކުންނެވެ. އެގޮތުން މިދިޔަ މަހު 11.3 މިލިއަން ރުފިޔާ މަސްވެރިންނަށް ވަނީ ދޫކޮށްފައެވެ.
މިއަހަރު މަސްވެރިކަން އެންމެ ރަނގަޅުވެފައިވަނީ މިދިޔަ އޭޕްރީލް މަހުގައެވެ. އެގޮތުން އޭޕްރީލް މަހު ޖުމުލަ 78.8 މިލިއަން ފުފިޔާ ވަނީ މަސްވެރިންނަށް ދޫކޮށްފައެވެ.
މިފްކޯއިން ބުނެފައިވާ ގޮތުގައި، މިދިޔަ ދުވަސްތަކުގައި މަސްވެރިކަން ދަށްވެފައިވަނީ ބޮޑުތިލަދުންމަތިން ފެށިގެން ދެކުނަށްވެސް އެންވެރިކަން ދަށްވުމާ ގުޅިގެންނެވެ. ޖޫން މަހުގެ ބައެއް ދުވަސްތަކުގައި ދުވާލެއްގެ މައްޗަށް ދޫކުރި ފައިސާގެ އަދަދު 200,000 ރުފިޔާއަށްވުރެ ދަށަށް ގޮސްފައިވީ ނަމަވެސް، މިއީ ހުޅަނގު މޫސުމުގެ ބާރުގަދަވުމާއެކު ކޮންމެ އަހަރެއްގެވެސް ޖޫން އަދި އޯގަސްޓް މަހު އާންމުކޮށް މަސްވެރިކަން ދަށްވާ ދުވަސްވަރެއް ކަމަށް އެ ކުންފުނިން ބުނެއެވެ.
މިހާރު މަސްވެރިކަން އަލުން ރަނގަޅުވާން ފަށާފައިވާކަން ފާހަގަކުރަމުން މިފްކޯއިން ބުނެފައިވަނީ، ކުރިއަށް އޮތް ދުވަސްތަކުގައި މަސް ކިރުވާ މިންވަރު 50 ޓަނަށްވުރެ އިތުރުވާނެ ކަމަށް ލަފާކުރެވޭ ކަމަށެވެ. މިވަގުތު މަސްވެރިކަން އެންމެ ރަނގަޅީ ޅ. އަތޮޅު ހިމެނޭ ސަރަހައްދުގައެވެ.
މަސްވެރިކަން ދަށްވި ދުވަސްވަރުވެސް، މަސްވެރިންނަށް ލިބޭ އާމްދަނީ އިތުރުކުރުމަށް ސަރުކާރުން ވަނީ މަސައްކަތްތަކެއް ކޮށްފައެވެ. އެގޮތުން އިނގިރޭސިވިލާތުން ރާއްޖޭގެ ކަނޑުމަހަށް ޓެރިފް ނެގުން މެދުކަނޑާލުމާ ގުޅިގެން، މިފްކޯއިން ވަނީ މަސްގަންނަ އަގު މަތިކޮށްފައެވެ. މިދިޔަ ޖޫން މަހުގެ ނުވަ ވަނަ ދުވަހުން ފެށިގެން މިފްކޯގެ ބަނދަރުތަކުން މަސް ކިލޯއެއް ގަންނަމުންދަނީ 20 ރުފިޔާގެ މަގުންނެވެ.
