ރާއްޖޭގައި މިހާރު ފެތުރެމުންދާ ހިމަބިއްސަކީ ކޮންޓްރޯލް ނުކުރެވިގެން އުޅޭ ވަރުގެ ބައްޔެއް ނޫން ކަމަށާއި، ބަލި ކޮންޓްރޯލް ނުކުރެވޭ ހާލަތަކަށް ކަންކަން ނުދާ ކަމަށް ހެލްތު މިނިސްޓަރު ޤީލާ ޢަލީ މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ހުޅުމާލެ ދެކުނު ދާއިރާ ތަމްސީލުކުރައްވާ މެންބަރު ޑރ. އަޙުމަދު ޝަމްހީދު ކުރެއްވި ސުވާލަކަށް ޖަވާބު ދެއްވަމުން މިނިސްޓަރު ޤީލާ ވިދާޅުވީ، ރާއްޖެއިން މި ދުވަސްވަރު ހިމަބިހީގެ ކޭސްތައް ފެންނަމުންދާ ކަމަށާއި، ނަމަވެސް މި ބަލި އޮތީ ކޮންޓްރޯލް ނުކުރެވޭ ފަދަ ނުރައްކާތެރި ހާލަތެއްގައި ނޫން ކަމަށެވެ.
”ހިމަބިއްސަކީ ވަރަށް ކުރު މުއްދަތެއްގެ ތެރޭގައި އެކަކުގެ ގައިން އަނެކަކުގެ ގަޔަށް އަރާ ބައްޔަކަށް ވާތީ އެ ބަލި ފަސޭހަވާން ނަގާ މުއްދަތު ވެސް ވަރަށް ކުރުވާނެ. އެހެންވީމަ މި ބައްޔަކީ އަޅުގަނޑުމެންނަށް އާދަޔާ ހިލާފަށް ފެތުރެމުންދާ ނުވަތަ ބަލި ކޮންޓްރޯލް ނުކުރެވިގެން އުޅޭ ވަރުގެ ބައްޔެއް ނޫން،“ – މިނިސްޓަރު ވިދާޅުވިއެވެ.
މިނިސްޓަރު ޤީލާ އިތުރަށް ވިދާޅުވީ ކޮންމެ ބައްޔަކީ ވެސް އެ ބައްޔަކާ ގުޅިގެން އަޅަންޖެހޭ ރައްކާތެރިކަމުގެ ފިޔަވަޅުތައް އަޅައި، ކޮންޓްރޯލް ކުރުމަށް މިނިސްޓްރީން ހާއްސަ އިސްކަމެއްދީގެން މަސައްކަތް ކުރަމުން އަންނަ ބައްޔެއް ކަމަށެވެ. އަދި ހިމަބިއްސާ ގުޅޭ އިތުރު މައުލޫމާތު ދިނުމަށް މަޖިލީހަށް ހާޒިރުވާނެ ކަމަށް ވެސް އެކަމަނާ ވިދާޅުވިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފައިވާ ތަފާސްހިސާބުތަކަށް ބަލާއިރު، މިދިޔަ ހަފުތާގައި އެކަނިވެސް މާލެ ސަރަހައްދުން ހިމަބިހީގެ 55 ކޭސް ފެނިފައިވެއެވެ. މިއާއެކު މިއަހަރުގެ މިހާތަނަށް ޖުމްލަ 121 ކޭސް ވަނީ ރިޕޯޓްކޮށްފައެވެ. ބަލިން ރައްކާތެރިވުމަށް ސަރުކާރުން ފަށާފައިވާ ވެކްސިން ޕްރޮގްރާމްގެ ދަށުން މިހާތަނަށް 5،495 މީހުންނަށް ވެކްސިން ދީފައިވާ ކަމަށް އެ އެޖެންސީން ވަނީ ބުނެފައެވެ.
ދިވެހިރާއްޖެއަކީ 2017 ވަނަ އަހަރު ހިމަބިހި ނައްތާލެވިފައިވާ ގައުމެއްގެ ގޮތުގައި ކަނޑައަޅާފައިވާ ގައުމެއް ނަމަވެސް، ދޭތެރެ ދޭތެރެއިން ބިދޭސީންގެ ފަރާތުން ބަލި ފެނެއެވެ. މިފަހަރު ކަންބޮޑުވުން އިތުރުވެފައިވަނީ ދިވެހިންގެ ތެރޭގައި ބަލި ފެތުރެމުންދާތީއެވެ.
