ދިވެހި ލިޔުންތެރިން ވާންޖެހޭނީ ޤައުމަށް ފާގަތިވާނެ ގޮތަށް ލިޔާ އަމާނާތްތެެރި ޤައުމުދެކެ ލޯބިވާ ބަޔަކަށްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރާއްޖޭގެ 34 ވަނަ ލިޔުންތެރިންގެ ދުވަހުގެ ތަހުނިޔާ ފޮނުއްވައި ރައީސް ސޯޝަލް މީޑިއާ މެދުވެރިކޮށް ދެއްވި މެސެޖުގައި ވިދާޅުވީ ދިވެހި ލިޔުންތެރިން ވާންޖެހޭނީ މި ޤައުމު އަބަދުމެ ފަޚުރުވެރިވާނެ، އަދި ޤައުމަށް ފާގަތިވާނެ ގޮތަށް ލިޔާ އަމާނާތްތެރި، ޤައުމުދެކެ ލޯބިވާ ބަޔަކަށްކަމުގައެވެ. ދިވެހި އަދި ބަހުން ލިޔާ ކޮންމެ ލިޔުންތެރިއަކުވެސް ޙައްޤުބަސް ފެތުރުމަށާއި، ރީތިކޮށް މުޚާޠަބުކުރުމަށް ރައީސް ނަސޭހަތްތެރިވެވަޑައިގަތެވެ.
މީގެ އިތުރުމް ތިމާއަށާއި އަނެކުންނަށް މިއަދާއި މާދަމާވެސް ފައިދާކުރާނެ ރަނގަޅު ވާހަކަތަކާއި ފިކުރުތައް ފެތުރުމަށް ލިޔުންތެރިންގެ ކިބައިން ރައީސް އެދިވަޑައިގެންފައިވެއެވެ.
މާތްވެގެންވާ އިސްލާމްދީނަކީ އުނގަންނައިދިނުމާއި، ތެދު މަޢުލޫމާތު ފެތުރުމަށް އަދި ލިޔުންތެރިކަން ކުރިއެރުވުމަށް ބާރުއަޅާ ދީނެއްކަން ރައީސް ފާހަގަކުރެއްވިއެވެ. ލިޔުންތެރިކަމަކީ ހެޔޮ މަގަށް މީސްތަކުން ގެންދިއުމަށް ބޭނުންކުރެވޭ ވަރުގަދަ ވަސީލަތެއްކަމަށާއި، މި ވަސީލަތް ބޭނުންކުރަންވާނީ ޒިންމާދާރުކަމާއެކުކަމުގައިވެސް އެމަނިކުފާނު ވިދާޅުވިއެވެ.
ރާއްޖޭގެ ލިޔުންތެރިންގެ ދުވަސް ފާހަގަކުރަނީ 1933 ވަނަ އަހަރުގެ ޖުލައި މަހުގެ 8 ވަނަ ދުވަހު ރާއްޖޭގައި ފުރަތަމަ މަޖައްލާކަމަށްވާ ”އަލްއިޞްލާޙު“ ނެރުނު ތާރީޚާ ގުޅުވައިގެންނެވެ. ރާއްޖޭގައި ރަސްމީކޮށް މި ދުވަސް ފާހަގަކުރަން ފެށީ 1993 ވަނަ އަހަރުގެ ޖުލައި މަހުގެ 8 ވަނަ ދުވަހުއެވެ. މި އަހަރަކީ މި ދުވަސް ފާހަގަކުރާތާ 34 އަހަރު ފުރޭ މުނާސަބަތެވެ.
ދިވެހި ތާރީޚަށް ބަލާއިރު، ރާއްޖެ ބިނާކުރުމުގައި ލިޔުންތެރިން ވަނީ މުހިންމު ޒިންމާތަކެއް އަދާކުރައްވައިފައެވެ. ދީނީ ޢިލްމުވެރިން ދީނީ ރޮނގުންނާއި، އަދަބީ ޢިލްމުވެރިން އަދަބީ ރޮނގުންނާއި، ތާރީޚު ޢިލްމުވެރިން ތާރީޚީ ރޮނގުން މުޖުތަމަޢަށް އަގުހުރި ޚިދުމަތްތަކެއް ކޮށްދެއްވާފައިވެއެވެ. ހަމަ އެފަދައިން، ނޫސްވެރިންނާއި ސިޔާސީ ބޭފުޅުން ވެސް ޤައުމުގެ ކުރިއެރުމަށް ލިޔުންތެރިކަމުގެ ހުނަރު ބޭނުންކޮށްގެން ފާހަގަކޮށްލެވޭ މަސައްކަތްތަކެއް ކޮށްފައިވާކަން ފާހަގަކުރެވެއެވެ.
