ދިވެހިރާއްޖޭގެ 34 ވަނަ ލިޔުންތެރިންގެ ދުވަސް ފާހަގަކުރަމުންދާ މި ދަނޑިވަޅުގައި، ދިވެހި އަދަބިއްޔާތާއި ލިޔުންތެރިކަން ކުރިއެރުވުމަށް އަގުހުރި މަސައްކަތްތަކެއް ކުރައްވަމުން ގެންދަވާ އެންމެހައި ލިޔުންތެރިންނަށް ފަސްޓް ލޭޑީ ސާޖިދާ މުހައްމަދު ހޫނު ހެޔޮ އެދުންތަކާއި ތަހުނިޔާ ފޮނުއްވައިފިއެވެ.
ދިވެހި ލިޔުންތެރިންނަކީ ގައުމުގެ ސަގާފަތާއި ތާރީހު އަދި އަދަބިއްޔާތު ދިރުވައި އާލާކުރުމުގައި މުހިންމު ދައުރެއް އަދާކުރައްވާ ބައެއްކަން ފަސްޓް ލޭޑީ ފާހަގަކުރެއްވިއެވެ.
ރައީސް ޑރ. މުހައްމަދު މުއިއްޒުވެސް ވަނީ ލިޔުންތެރިންގެ ދުވަހުގެ ތަހުނިޔާ ފޮނުއްވައިފައެވެ.
ރައީސްގެ މެސެޖުގައި ވަނީ ހައްގު ބަސް ފެތުރުމަށާއި، ރީތިކޮށް މުޚާތަބުކުރުމަށާއި، ތިމާ އާއި އަނެކުންގެ މިއަދާއި މާދަމާއަށް ފައިދާވާނޭފަދަ ރަނގަޅު ވާހަކަތާކާއި ފިކުރުތައް ފެތުރުމަށް ދިވެހި ލިޔުންތެރިންނަށް އިލްތިމާސްކުރައްވައިފައެވެ.
މި އަހަރުގެ ލިޔުންތެރީންގެ ދުވަހަށް ކަނޑައަޅުއްވާފައިވަނީ، ”އަމާނާތްތެރި ލިޔުންތެރިއަކަށް ވަމާ!“ މި ޝިޢާރެވެ.
