މާލެއާއި އަތޮޅުތަކާ ދެމެދު މުދަލާއި ފަސިންޖަރުން އުފުލާ އުޅަނދުފަހަރު ގާތްކުރާ މާލޭ ނޯތު ހާބަރުގެ އޭ-ޒޯނުން ބޭނުންވާ ފެނާއި ކަރަންޓުގެ ހިދުމަތް އިއްޔެއިން ފެށިގެން ރަސްމީކޮށް ދޭން ފަށައިފިއެވެ.
މާލޭ ނޯތު ހާބަރު ބަލަހައްޓާ މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ހާމަކޮށްފައިވާ ގޮތުގައި، ބާޒާރުމައްޗާ ވީ ފަޅީގައި އޮންނަ ސަރަހައްދުން މި ހިދުމަތް ދޭން ފެށީ ބޮޑުތަކުރުފާނު މަގު ފުޅާކުރުމުގެ މަސައްކަތް ނިމުމާ ގުޅިގެންނެވެ. މީގެކުރިން މާލޭ އުތުރު ބަނދަރުގައި މި ހިދުމަތްތައް ލިބެމުން އައީ ހަމައެކަނި ބީ-ޒޯނާއި ސީ-ޒޯނުންނެވެ. ނަމަވެސް، އޭ-ޒޯނުގައި މި ހިދުމަތްތައް ގާއިމުކުރުމުގެ އަމަލީ މަސައްކަތް އެމްޕީއެލް އިން ފަށާފައިވަނީ މިއަހަރުގެ މާރިޗު މަހުގެ ތެރޭގައެވެ.
އެމްޕީއެލްއިން ބުނެފައިވާ ގޮތުގައި، އޭ-ޒޯނުން ފެނާއި ކަރަންޓުގެ ހިދުމަތް ދޭން ފެށުމަކީ ބަނދަރު ބޭނުންކުރާ އުޅަނދުފަހަރަށް ލިބިގެންދާނެ ވަރަށް ބޮޑު ލުއިފަސޭހަކަމެކެވެ. މިގޮތުން، އެ ސަރަހައްދުން މިހާރު އެއްފަހަރާ 48 އުޅަނދަށް ކަރަންޓުގެ ހިދުމަތް ދިނުމުގެ ގާބިލުކަން ހުރިއިރު، ފެން ފޯރުކޮށްދިނުމަށްޓަކައި 16 ޕޮއިންޓެއް ވަނީ ގާއިމުކޮށްފައެވެ.
މި މަޝްރޫއު ކާމިޔާބުކަމާއެކު ނިންމާލުމުގައި އެމްޕީއެލްގެ ކަމާގުޅޭ އެކި ޑިޕާޓްމަންޓްތަކުން ކުރި އިހުލާސްތެރި މަސައްކަތް އެ ކުންފުނިން ވަނީ ފާހަގަކޮށް، ޝުކުރު އަދާކޮށްފައެވެ.
މާލޭ އުތުރުބަނދަރު ބަލަހައްޓާ މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ނެރުނު ބަޔާނެއްގައި ބުނީ އެ ބަނދަރުގައި ކުރިން ފެނާއި ކަރަންޓުގެ ހިދުމަތް ދެމުން އައީ ހަމައެކަނި ބީ-ޒޯނާއި ސީ-ޒޯނުން ކަމަށާއި އޭ-ޒޯނުން އެެ ހިދުަމތް ދޭން ފެށީ ބޮޑުތަކުރުފާނު މަގުގެ އެ ސަަރަހައްދު ފުޅާކޮށް ނިމުމުން، އެ ހިދުމަތް ދޭން ރަައީސް ޑރ. މުހައްމަދު މުއިއްޒު އަންގަވައިގެން ކަމަށެވެ.
