މާލޭގެ ބޮޑުތަކުރުފާނު މަގު ޒަމާނީ ފެންވަރަށް ތަރައްގީކުރުމުގެ މަސައްކަތުގެ ތެރެއިން، ހެންވޭރު ފެރީ ޓާމިނަލުން ފެށިގެން ފޮރިން މިނިސްޓްރީއާ ހަމައަށް ތާރު އަޅައި ނިންމައިފި އެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމްޓީސީސީއާ ހަވާލުކޮށްގެން ކުރިއަށް ގެންދާ މި މަޝްރޫއުގެ ދަށުން، މިހާރު ތާރު އަޅައި ނިމިފައިވާ ބަޔަކީ ހެންވޭރު ފެރީ ޓާމިނަލުން ފެށިގެން ފޮރިން މިނިސްޓްރީގެ އިމާރާތާ ހަމައަށެވެ.
މި މަސައްކަތް ރޭ ދަންވަރު ނިންމާފައިވާއިރު، ފޮރިން މިނިސްޓްރީން ފެށިގެން ރަސްމީ ފާލަމާ ހަމައަށް ތާރު އެޅުމުގެ މަސައްކަތް ކުރިއަށް އޮތް ހަފުތާގެ ނިޔަލަށް ނިންމުމަށް ވަނީ އަމާޒު ހިފައިފަ އެވެ. މި މަގު އާންމު ދަތުރުފަތުރަށް ހުޅުވާލާނީ މަސައްކަތުގެ ބާކީ ބައި ވެސް ފުރިހަމަކުރުމަށް ފަހު އެވެ.
މިދިޔަ މާޗު މަހުގެ 23 ވަނަ ދުވަހު ފެށި މި މަޝްރޫއަކީ ދައުލަތުގެ ބަޖެޓުން 144 މިލިއަން ރުފިޔާ ހަރަދުކޮށްގެން ކުރިއަށް ގެންދާ މުހިންމު މަސައްކަތެކެވެ. ޖުމުލަ 455 ދުވަހުގެ ތެރޭގައި ނިންމަން ކަނޑައަޅާފައިވާ މި މަޝްރޫއުގެ ދަށުން، މި މަހުގެ 26 ވަނަ ދުވަހުގެ ކުރިން މަސައްކަތް އެއްކޮށް ނިންމައި އާންމުންނަށް ހުޅުވާލުމަށް އެމްޓީސީސީން މަސައްކަތް ކުރަމުން ދެ އެވެ. ކުރިން ގާ އަތުރާފައި އޮތް މި މަގު ވަރަށް ބޮޑަށް ހަލާކުވެ، ދަތުރުފަތުރަށް އުނދަގޫތަކެއް ކުރިމަތިވެފައި އޮތުމުން، މި މަސައްކަތަކީ އެ ސަރަހައްދުގެ ތޮއްޖެހުމަށް ލުޔެއް ގެނެސްދޭނެ މުހިންމު ފިޔަވަޅެކެވެ.
ބޮޑުތަކުރުފާނު މަގު ޒަމާނީ ފެންވަރަށް ހެދުމުގެ މަސައްކަތާ އެކު، އެ މަގުގެ ފުޅާމިން ވަނީ ދެގުނައަށް އިތުރުކޮށްފަ އެވެ. މީގެ އިތުރުން، މަގުގެ އެއް ފަޅީގައި ޕާކުކުރެވޭނެ އިންތިޒާމު ހަމަޖެއްސުމާއި، މަސްވެރިންނަށް ހާއްސަ ޕާކު ސަރަހައްދެއް ގާއިމުކުރުމަށް ވަނީ ހަމަޖެހިފަ އެވެ.
ހާއްސަކޮށް ސައިކަލުތައް ޕާކުކުރެވޭނެ ހާއްސަ ސަރަހައްދެއް ބޭންކް އޮފް މޯލްޑިވްސްގެ މައި އިމާރާތުގެ ކުރިމަތިން ހެދުމަށް ވަނީ ނިންމާފަ އެވެ. މީގެ ކުރިން ނޯތު ހާބަރުން ފެށިގެން ޖުމްހޫރީ މައިދާނާ ހަމައަށް ތާރު އަޅައި ނިންމާފައިވާ ސަރަހައްދުތަކުން ވެސް ޓްރެފިކްގެ ތޮއްޖެހުން ކުޑަވެ، އާންމު ރައްޔިތުންނަށް ބޮޑެތި ލުއިފަސޭހަތަކެއް ލިބެމުންދާކަން ފާހަގަކުރެވެ އެވެ.
