އިންޑިއާގެ ވެސްޓު ބެންގާލްގައި ސައުތު 24 ޕަރްގާނަސްގެ ބަރޫއިޕޫރް ސަރަޙައްދުން ގެއްލިގެން ހޯދަމުންދިޔަ 12 އަހަރުގެ މުސްލިމް އަންހެން ކުއްޖަކު ރޭޕްކޮށް، ރަހުމްކުޑަގޮތަކަށް މަރާލާފައި އޮއްވާ ފެނުމާ ގުޅިގެން އެ ސަރަޙައްދުގައި ބޮޑު މުޒާހަރާތަކެއް ފަށައި، މަސްރަޙް ވަރަށް ބޮޑަށް ހޫނުވެއްޖެއެވެ. މި ޖަރީމާގެ ތުހުމަތުގައި ފުލުހުން ވަނީ ވެރިކަންކުރާ ބީޖޭޕީ ޕާޓީގެ މެންބަރެއް ހިމެނޭހެން ބަޔަކު ހައްޔަރުކޮށްފައެވެ.
ޙާދިސާގެ ތަފްޞީލާއި ސިޔާސީ ނުފޫޒު
އާއިލާއިން ބުނި ގޮތުގައި އެ ކުއްޖާ ގެއްލިފައިވަނީ ހޮނިހިރު ދުވަހުގެ ހަވީރު ބާޒާރަށް ކާއެއްޗެހި ގަންނަން ދިޔަ ގޮތަށެވެ. ކުއްޖާ ޚަބަރެއް ނުވުމުން އާއިލާއިން ވަނީ ލޯކަލް ފުލުހުންނަށް މައްސަލަ ހުށަހަޅާފައެވެ. އަދި އޭގެ އެއްދުވަސް ފަހުން އެ ކުއްޖާގެ ހަށިގަނޑު ވަނީ ފެނިފައެވެ.
މި މައްސަލައިގައި ފުލުހުން މިހާތަނަށް ދެ މީހަކު ހައްޔަރުކޮށްފައިވާއިރު، އޭގެ ތެރޭގައި ހިމެނެނީ ބީޖޭޕީގެ އެކްޓިވިސްޓެއް ކަމަށްވާ ޝާންތަނޫ މަންޑަލް އެވެ. މީގެ އިތުރުން ސުވާލުކުރުމަށްޓަކައި އިތުރު ތިން މީހަކު ފުލުހުންގެ ބެލުމުގެ ދަށަށް ވަނީ ގެންގޮސްފައެވެ.
މުސްލިމް ކުއްޖާގެ މަރުގެ މައްސަލައިގައި އިންސާފު ހޯދުމަށް ގޮވާލައި އެ ސަރަޙައްދުގެ އެތައް ހާސް ބަޔަކު ދަނީ މަގުތަކަށް ނިކުމެ ބޮޑެތި މުޒާހަރާތައް ކުރަމުންނެވެ. ބީޖޭޕީގެ ނުފޫޒުން މައްސަލަ އޮއްބާލަން އުޅޭކަމުގެ ތުހުމަތާއެކު، ހުޅަނގު ބަންގާޅުގެ ފުލުހުން ވަނީ ސަލާމަތީ ކަންކަން ވަރުގަދަކޮށްފައެވެ.
