ކުރީގެ ރައީސް ޢަބްދުﷲ ޔާމީން މައްސަލައިގެ އިސްތިއުނާފު ހުކުމް މިއަދު މެންދުރަށް ހައިކޯޓުން ތާވަލުކޮށްފިއެވެ.
ވ. އާރަށް ކުއްޔަށް ދޫކުރުމުގެ މުއާމަލާތާ ގުޅިގެން ރިޝްވަތާއި މަނީ ލޯންޑްރިންގެ ކުށުގައި ރައީސް ޔާމީން 11 އަހަރަށް ޖަލަށްލުމަށް ކްރިމިނަލް ކޯޓުން 2022 ވަނަ އަހަރު ކުރި ހުކުމުގެ އިސްތިއުނާފު އަޑުއެހުންތައް މިދިޔަ ނޮވެމްބަރު މަހު އޮތީ ނިމިފައެވެ.
މި މައްސަލައިގެ އަޑުއެހުންތައް ނިމިފައި އޮންނަތާ ތިން މަހަށް ވުރެ ގިނަ ދުވަސް ވީފަހުން މައްސަލަ ހުކުމް ކުރުމަށް ތާވަލުކޮށްފައިވާއިރު، އެ މައްސަލަ ލަސްވެގެން މިހާރު އޮތީ ޖުޑީޝަލް ސަރވިސް ކޮމިޝަން (ޖޭއެސްސީ) ގައެވެ.
ހައި ކޯޓުގައި އެ ހުކުމް އިސްތިއުނާފުކޮށް ހިންގި ޝަރީއަތުގައި، އެންމެފަހުން އަޑުއެހުމެއް ބާއްވާފައި ވަނީ މިދިޔަ އަހަރުގެ ނޮވެމްބަރު މަހުގެ 21 ވަނަ ދުވަހުއެވެ. އެ ދުވަހު ކުރިއަށް ގެންގޮސްފައި ވަނީ މައްސަލައިގެ ފަހު ބަސް އިއްވުމެވެ.
ގއ. ވޮޑަމުއްލާ ކުއްޔަށް ދޫކުރުމުގެ މުއާމަލާތާ ގުޅިގެން ވެސް މަނީ ލޯންޑްރިންގެ ކުށް ސާބިތުވެ، ރައީސް ޔާމީން ފަސް އަހަރަށް ޖަލަށްލުމަށް 2019 ވަނަ އަހަރު ކްރިމިނަލް ކޯޓުން ހުކުމްކުރިއެވެ. އެެހެންނަމަވެސް 2021 ވަނަ އަހަރު ސުޕްރީމް ކޯޓުން ވަނީ އެ ހުކުމް ބާތިލުކޮށް، އެމަނިކުފާނު މިނިވަންކޮށްފައެވެ.
