އެއްވެސް އުޒުރެއް ނެތި ދަރިވަރުން ސްކޫލަށް ނުދާ މައްސަލައަކީ ސަރުކާރުން ނުހަނު ސީރިއަސްކޮށް ބަލަމުންދާ މައްސަލައެއް ކަމަށާއި، އެކަމާ ގުޅިގެން އަޅަންޖެހޭ ފިޔަވަޅުތައް އެޅުމަށް ހުރިހާ ސްކޫލުތަކަށް އަންގާފައިވާނެ ކަމަށް އެޑިއުކޭޝަން މިނިސްޓަރު ޑރ. އިސްމާޢީލް ޝަފީޢު ވިދާޅުވެއްޖެއެވެ.
ނެޝަނަލް އެސެސްމަންޓް އޮފް ލަރނިން އައުޓްކަމްސް ރިޕޯޓް އާންމުކުރުމަށް ބޭއްވި ހަފްލާގައި ވާހަކަފުޅު ދައްކަވަމުން މިނިސްޓަރު ޝަފީޢު ވަނީ، މި ދުވަސްވަރު 8،000 އެއްހައި ދަރިވަރުން ސްކޫލަށް ނުދާކަން ފާހަގަކުރައްވާފައެވެ. މިއީ ތައުލީމީ ދާއިރާއަށް ކުރިމަތިވެފައިވާ ބޮޑު ގޮންޖެހުމެއްގެ ގޮތުގައި މިނިސްޓަރު ސިފަކުރެއްވިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރަކު ކުރެއްވި ސުވާލަށް ޖަވާބު ދެއްވަމުން މިނިސްޓަރު ޝަފީޢު ވިދާޅުވީ، ސްކޫލަށް ނުދާ ދަރިވަރުން ދެނެގަނެ، އެކަމަށް ބޮޑު އިސްކަމެއްދީގެން މަސައްކަތް ފެށުނީ ޕީޕީއެމްގެ ސަރުކާރެއްގައި ކަމަށެވެ. ނަމަވެސް، ވޭތުވެދިޔަ އެމްޑީޕީ ސަރުކާރުގައި މި މޮނިޓަރިންގ މެކެނިޒަމް ނިޒާމު ވަރަށް ބޮޑަށް ދަށްވެގެން ދިޔަކަން މިނިސްޓަރު ފާހަގަކުރެއްވިއެވެ.
”އޭރުގައި ސުކޫލަށް ނުދާކުދިން ދެނެގަނެ، ސުކޫލަށް ކުދިން ގެނައުމުގެ މަސައްކަތް ފެށިގެން ދިޔައީ. ނަމަވެސް އެމްޑީޕީއަށް ވެރިކަން ލިބުމާއެކު މި މޮނިޓަރިން މެކެނިޒަމް ވަރަށް ބޮޑަށް ދަށްވެގެން ދިޔައީ. އެޓެންޑެންސް ޕޮލިސީއެއް އޮވޭ. އެކަމަކު އޭގައި ވާގޮތުން ސުކޫލުތަކުން ރިޕޯޓްކުރަން މިޖެހެނީ މިހާ ކުދިން ނަދެޔޭ. ވަކި މުއްދަތުތަކެއް ހުރޭ. ތިން ދުވަސް. 10 ދުވަސް. އެގޮތަށް ކަނޑައަޅަފައި ހުރޭ ލޯންގް އެބްޒެންޓިޒަމްއަކީ 10 ދުވަހޭ. ޖެހިޖެހިގެން ތިން ދުވަހު ނައިއްސިނަމަ ރިޕޯޓްކުރަންޖެހޭނެއޭ. މިނިސްޓްރީއަށް ލިބެމުންދިޔައީ އެ މައުލޫމާތު ސުކޫލްތަކުން ފޮނުވީމާ،“ – މިނިސްތަރު ޝަފީޢު ވިދާޅުވިއެވެ.
މިނިސްޓަރު އިތުރަށް ވިދާޅުވީ، އަލަށް ގެނެވޭ ބަދަލާއެކު ކޮންމެ ދުވަހެއްގެ އެޓެންޑެންސް މިނިސްޓްރީއަށް ފޮނުވަން ސްކޫލުތަކަށް މަޖުބޫރުވާނެ ކަމަށާއި މިގޮތަށް ދުވަހުން ދުވަހަށް މައުލޫމާތު އެއްކުރަން ފެށުމުން، ގިނަ އަދަދެއްގެ ދަރިވަރުން ސްކޫލަށް ނުދާކަން ސާފުކޮށް ދެނެގަނެވިގެންދާނެ ކަމަށެވެ.
