ޕްލާސްޓިކް ކޮތަޅުން ނަގާ ފީ، ކޮތަޅު ގަނޑުކޮށް ގަންނަ މީހުން ދައްކަން ނުޖެހޭ ގޮތަށް ހެދުން ހިމެނޭހެން، ކުނި މެނޭޖްކުރުމުގެ ގާނޫނަށް އިސްލާހުތަކެއް ގެންނަން ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅި ބިލުގެ ބަހުސް މިއަދު ފަށައިފިއެވެ.
ސަރުކާރުގެ ފަރާތުން އުނގޫފާރު ދާއިރާގެ މެންބަރު އިބްރާހީމް ޝިފާޒް ހުށަހެޅުއްވި މި ބިލުގައިވާ ގޮތުން، 50 ކޮތަޅަށް ވުރެ ގިނައިން ހުންނަ ކޮތަޅުބޮނޑި ހިމަނާނީ ޕްލާސްޓިކް ކޮތަޅުން ނަގާ ފީ އިން އިސްތިސްނާވާ ބާވަތެއްގެ ގޮތުގައެވެ. މިއީ ކޮތަޅު ބޮނޑި ގަންނައިރު ކޮންމެ ކޮތަޅަކަށް ދެ ރުފިޔާ ނެގުމުގެ ސަބަބުން އާންމުންނަށް ކުރިމަތިވަމުންދާ ތަކުލީފުތަކަށް ހައްލެއް ހޯދުމަށް ހުށަހެޅި ބަދަލެކެވެ.
ކުނި މެނޭޖްކުރުމުގެ ގާނޫނުގެ 32 ވަނަ މާއްދާގައި މިހާރު އޮތީ ފީ ނެގުމުން އިސްތިސްނާވާ ތިން ބާވަތެކެވެ. އެއީ:
- ޑިއުޓީފްރީ ފިހާރަތަކުން ދޭ ނުވަތަ ވިއްކާ ކޮތަޅު.
- ބަންދުނުކޮށް ހުންނަ ތާޒާ މަސް އަޅަން ބޭނުންކުރާ ކޮތަޅު.
- ކުނި މެނޭޖްކުރުމުގެ ހިދުމަތްދޭ ފަރާތްތަކުން ނުވަތަ އެކަމާ ބެހޭ އެހެން އިދާރާއަކުން، ކުނި އަޅަން ހާއްސަކޮށް ވިއްކާ ނުވަތަ ދޫކުރާ ބިންލައިނާ.
މިއަދު ބަހުސް ފެށި ބިލުގައި ހުށަހަޅާފައިވަނީ އެ މާއްދާއަށް އަކުރެއް އިތުރުކޮށް، 50 އަށްވުރެ ގިނަ ކޮތަޅު ހިމެނޭ ކޮތަޅު ބޮނޑި، އިސްތިސްނާގެ ތެރޭގައި ހިމެނުމަށެވެ.
މީގެ އިތުރުން، ޕްލާސްޓިކް ކޮތަޅުން ފީ ނެގުމުގެ ނިޒާމަށް ގެންނަން ހުށަހަޅާފައިވާ އަނެއް މުހިންމު ބަދަލަކީ ޖީއެސްޓީއަށް ރަޖިސްޓްރީކޮށްފައި ނުވާ ތަންތަނުން ދޫކުރާ ކޮތަޅަށް ވެސް ފީ ނަގާ ގޮތަށް ހަމަޖެއްސުމެވެ. އަދި އެގޮތަށް ނަގާ ފީއާ މެދު އަމަލުކުރާނެ ގޮތުގެ ގަވައިދެއް ހަދަން މިނިސްޓްރީއަށް ލާޒިމު ކުރުމަށް ވެސް ބިލުގައި ހިމަނާފައިވެއެވެ.
ސަރުކާރުން ހުށަހެޅި މި ބިލުގައިވާ ގޮތުން، ޖީއެސްޓީއަށް ރަޖިސްޓްރީކޮށްފައި ނުވާ ފަރާތްތަކުން ވެސް ޕްލާސްޓިކް ކޮތަޅަށް ފީ ނަގާކަން ކަށަވަރުކުރުމަކީ މިނިސްޓްރީން ކުރަންޖެހޭ ކަމެކެވެ. ކުނި މެނޭޖްކުރުމުގެ ގާނޫނު މިހާރު އޮތް ގޮތުން ޕްލާސްޓިކް ކޮތަޅުން ނަގާ ފީ ތަކުރާރުކޮށް އެތައް ފަހަރަކު ނަގަންޖެހުމުގެ ސަބަބުން ބައެއް ފަރާތްތަކުން ދިޔައީ އެކަމާ ކަންބޮޑުވުން ފާޅުކުރަމުންނެވެ.
